NABALAKA si Davao City Public Safety and Security Command Center (PSSCC) head Angel Sumagaysay sa pagbuhi sa 34 ka mga nakonbikto sa niluog nga krimen gikan sa siyudad sa Davao kinsa nakapahimulos sa good conduct time allowance (GCTA).
Sa tigum Miyerkules, Septiyembre 11, sa The Royal Mandaya Hotel, gisulti ni Sumagaysay nga bisan si Presidente Rodrigo Duterte naalarma sa pagbuhi sa mga konbiktado nga dunay mga kasong “heinous crimes” ug nihatag kanila og 15-adlaw nga ultimatum aron nga motahan sa kaugalingon alang sa imbestigasyon.
“Even the President nagsabi siya ng kung there is a malicious proceeding during the granting of GCTA, these people again might do something na hindi maganda sa society,” pagklaro ni Sumagaysay.
Niadtong Septyembre 4, nimando si Duterte sa mga konbiktado nga gibuhian pinaagi sa GCTA nga mosurender sa pulis alang sa subling pag-evaluate ug pag-ihap og balik sa ilang GCTA.
Kon di sila mopatim-aw, isipon silang mga pugante sa balaod.
“Maybe as to the reformations, hindi pa natin masisiguro ‘yan that’s why they are considered again na volatile sa society. Tingnan lang natin because ongoing ‘yong investigation but we heard a lot of pronouncements na itong mga tao na ito, ‘yong status nila they might do something which is not good for the society,” matud ni Sumagaysay.
Base sa Police Regional Office (PRO)-Davai, dunay 76 ka heinous crime convicts kinsa gibuhian subay sa rekord sa Bureau of Corrections (BuCor).
Ang dakbayan sa Davao maoy dunay pinakataas nga ihap nga niabot og 36 convicts ug duha nisurender; Davao del Norte naay 9; Compostela Valley dunay 4, Davao Oriental 12; Davao del Sur 13, usa ang nisurender; ug Davao Occidental 2.
Kini nga mga indibiduwal gibuhian gikan Oktubre 2013 hangtud 2019.
Ang duha ka nakonbikto nga nisurender sa Davao City giila nga sila si Danilo Palicte, 50, molupyo sa J.P. Laurel Avenue, Davao City kinsa nakonbikto sa kasong statutory rape ug Mateo Tecson Pasaporte, 68, Lacson, Calinan District, Davao City kinsa napriso tungod sa kasong lugos ug homicide.
Gidala sila pagbalik ngadto sa Davao Prison and Penal Farm alang sa “recomputation” sa GCTA. (JCR)