UPAT na ang namatay, samtang 18 ang naangol sa natigayong bangga sa bus ug wing van, ala 1 pasado sa hapon niadtong Martes, didto sa Barangay Binugao, Toril, Davao City.
Wala na mahitsura ang walang bahin sa yunit sa Mindanao Star ug ang tuong bahin sa wing van sa maong hitabo.
Sumala ni Lieutenant Colonel Jed Clamor, station commander sa Toril Police Station, nga ang mga nakabsan og kinabuhi mao kadtong mga pasahero nga naglingkod sa likod nga bahin sa drayber sa bus.
Sa inisyal nga imbestigasyon sa traffic section sa Toril PNP, giingong managsama nga paspas ang dagan sa duruha nga nagsugat, apan wala na makabig sa matag drayber ang manobela hinungdan nga nagsungag ang matag kilid sa maong mga sakyanan.
Sa kakusog sa impak sa bangga, natanggal ang kilid sa wing van ug wa na mahitsura ang kilid sa Mindanao Star.
Nasayran nga 40 ka mga pasahero ang sakay sa bus gikan Cotabato padung sa Davao City.
Giandam na sa awtoridad ang pagpasaka og kaso sa mga responsable sa aksidente. (Jeepy P. Compio)