TAGUM CITY -- Walay kalambigitan sa money investment schemes ang pagpusil kang Terencio Bacarisas Cañizares, 37-anyos, company driver ug residente sa Pangantungan, Bukidnon, Septyembre 9, didto sa Pioneer Avenue Highway, duol sa Mankilam Elementary School ning siyudad.
Kini ang gibutyag ni Police Regional Office (PRO) Davao Region spokesperson Police Major Jason Baria atol sa AFP-PNP press conference, Miyerkules, Septiyembre 11.
Una niini, nasayran nga samtang nagmaneho ang biktima sa iyang motorsiklo kalit siyang gitaparan sa nakamotorsiklo nga mamumuno, dayon gipusil.
Gilayong nahagba ang biktima kinsa wala maintimano ug nakapangayo pa og panabang sa mga tawo aron madala sa ospital samtang ang mamumuno daling misibat palayo sa crime scene.
Sa pikas bahin, di pa sab maingon sa kapulisan nga investment scheme-related incident ang nahitabong pagpamusil sa 21-anyos nga dalaga nga anak sa giingong agent sa PLC company gumikan hangtud karong panahona, wala pa nagpakita ang inahan sa biktima.
“Probably but not totally related kay wala pa nagpakita ang mama,” ingon ni Baria atol sa presscon.
Una nang nagpagula ang Tagum City PNP og pamahayag sa pagkondena sa sunod-sunod nga pagpamatay sa siyudad nga hinimoan sa wala maila nga mga mamumuno.
Migula sab ang istorya nga sunod-sunod ang natigayong pagpamatay sa siyudad human nahunong ang mga investment schemes sa dapit. (Jeepy P. Compio)