PATAY ang upat ka mga tawo nga maoy sakay sa usa ka trak nga dunay kargang mga construction materials human madisgrasya sa Diversion Road, Davao City Miyerkules sa udto, Septiyembre 11.
Subay sa report gikan sa Talomo Police Station, ang mga namatay mao sila Meljay Quillosa, nagpuyo sa Waan, Buhangin; Rolly Ambas Balagisi, 26-anyos; Justin Libayaw, 19-anyos pulos nagpuyo sa Paquibato District ning siyudad; ug ang drayber sa trak nga si alyas Tata (wala pa naila sa awtoridad).
Sa inisyal nga imbestigasyon sa traffic section sa Talomo Police Station, usa ka Isuzu Forward truck dunay plate no. ACN6036 nga gimaneho ni alyas Tata ang giingong nawad-an og kontrol samtang padung sa southbound lane sa Carlos P. Garcia Highway.
Pag-abot sa Orange Grove sa Matina Pangi, nalahos ang maong trak sa likuon nga bahin sa kalsada ug nabangga ngadto sa poste sa kuryente.
Sa kakusog sa bangga, dead on the spot ang upat samtang perteng gubaa sa Isuzu forward truck.
Kahinumdoman nga sa unahan nga bahin sa maong dalan, mao ang kanto sa Matina Pangi nga kanunay sab nga dunay mahitabong mga disgrasya nga mikalas og daghan sab nga kinabuhi gumikan kay maong bahin sa diversion road dulhugon. Ug nasayran nga kasagaran nga hinungdan sa disgrasya, mga sakyanan mawad-an og preno.
Mga patay nga lawas sa mga biktima anaa na sa lokal nga punerarya ning siyudad samtang padayon ang gihimong imbestigasyon sa kapulisan labot sa hitabo.