8 ka haligi sa commercial property gisugdan pagguba

GISUGDAN na og bungkag sa Filinvest Land Incorporated (FLI) estruktura diin gibutang ang walo ka haligi nga magsilbing taytayan para magsumpay sa residential area nga ilang gi-develop uban sa Cebu City Government nga nahimutang atbang sa IL Corso Mall sa South Road Properties (SRP).

Ang contractor sa FLI nibutang na og mga scaffolding ug net sa ibabaw ug blue nga trapal sa ubos nga bahin para dili motuasik ang mga kongretong semento ngadto sa karsada atol sa pagbungkag.

Base sa nakita sa Superbalita Cebu, ang contractor niuna og bakbak sa semento nga nagtapot sa bongbong sa IL Corso ug makita na ang mga kabilya sa ilawom nga maoy gitaptan sa sawog ibabaw sa haligi nga maoy magsilbing agianan sa mga tawo kon nadayon ang maong proyekto.

Si Atty. Jose Daluz III, Manager sa SRP nihangop ug nalipay sa gipakita nga aksyon sa nakapalit sa 19 ektaryas gikan sa 46 ektaryas nga yuta sa SRP niadtong tuig 2015 atol sa administrasyon ni kanhi mayor ug karon Bise Mayor Michael Rama.

“We are very happy to know nga nasugdan na ang paguba based on what they have promised that they will start the removal of the columns nga ni encroached sa setbacks. That will also show the good relationship between the city government and FLI.”PPadayag ni Daluz.

Niadtong hinapos nga buwan sa Hulyo, ang City Government pinaagi ni City Legal Officer Rey Gealon ug Daluz nipadala og komunikasyon ngadto sa management sa FLI pagkuha sa ilang mga haligi nga nagpatong sa sidewalk ug kon dili sila motuman, ang siyudad maoy personal nga mopaguba sa maong estruktura.

Sa unang semana sa Agusto, ang FLI nitubag sa suwat ug nihangyo nga hatagan sila og 100 ka adlaw sa pagsunod sa kamanduan sa City Government ubos sa liderato ni Mayor Edgardo Labella apan 60 ka adlaw ra ang gitugot sa dakbayan.

Bisan kon nituman na ang FLI sa kagustohan sa City Government apan ipadayon gihapon sa mga opisyal sa dakbayan ang pag-rescind sa ilang kontrata pagpalit upat na ka tuig ang nakalabay.

Si Daluz nagkanayon nga kon ilang dawaton ang P2.455 bilyones nga maoy ikaduha ug katapusang bayad sa FLI human sila nihatag og 50 porsyento nga downpayment sa 19.2 hectares aduna silay tulobagon sa Commission on Audit.

“Maigo man ta sa COA kon ato lang ning dawaton ang ilang kwarta because daghan nang violation based on the contract sa FLI and we have to settle this first. Naay mga penalties and interest diha kay sila man ang wala mobayad,” Dugang sa kanhi konsehal.

Ang SRP manager niingon nga gibutyag sa FLI ngadto sa publiko ug napatik sa pamantalaan ang ilang kagustohan pag-kansela sa kontrata nga gidawat ni kanhi Mayor Tomas Osmeña.

“So the best (for me) to settle this, is to follow anang pag-rescind sa contract kay mas dali na siya kompara sa atong ipadayon na kay daghan na kaayo ang supervening event nga nitumaw sama sa contract and penalty,” Butyag ni Daluz. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph