GIPASAKAAN karon ug kaso sa buhatan sa Visayas Ombudsman si Lapu-Lapu City Mayor Junard “Ahong” Chan sa moabot 28 sa 30 ka mga kapitan sa dakbayan sa Lapu-Lapu.
Kini may kalabotan sa gibuhat niining pagpahawa sa buhatan ni Kongresista Paz Radaza human milingkod isip mayor sa dakbayan.
Kasong Grave Coercion, Grave Misconduct, Condicy unbecoming of a Public Officer, Grave Abuse of Authority, Oppression and Violation of Section 3 (e) sa Republic Act RA 3019 kun corrupt practice of public official.
Si Association of Barangay Council ABC President ug ex-officio member Eduardo Cuizon ug laing 27 ka mga kapitan nga iyang sakop ang mi-file sa naasoyng kaso.
Labaw sa katunga o 25 sa 28 ka mga kapitan nga reklamante ang nakapirma sa complaint sanglit ang 3 matod ni Cuizon wala sa makauban kanila dihang ni-file sila sa kaso niadtong Septyembre 4.
Alang ni Cuizon ug sa mga kapitan dili makiangayon ang gibuhat nga pagpapahawa ni Chan ni Radaza sa iyang buhatan sanglit naanad na sila lakip na ang ilang mga konstituwenti nga modangop sa buhatan sa kongresista sa city hall sukad pa niadtong 2010.
Dili usab insakto ang gibuhat nga pagpapahawa sa mayor sa kongresista sanglit wala kini masubay sa balaod.
Gihimong basehanan ni Cuizon mao ang pagguba sa mga tawo ni Chan sa backdoor sa buhatan ni Radaza kaniadto sa unang adlaw nga paglingkod niini isip mayor sa dakbayan niadtong Hulyo 1 gumikan kay buot ayud kining moopisina sa buhatan ni Radaza.
Gawas pa niini giingong gi-harass ang mga staff sa kongresista sa mga tawo ni Chan.
Bisan paman dunay pending kaso sa korte mahitungod sa buhatan sa kongresista human gikiha si Radaza ug tulo ka indibidwal wala gayud kini tahora sa mayor pinaagi sa pagtaptap sa buhatan gamit ang plywood aron dili na makasulod ang szstaff sa kongresista niadtong Agusto 13.
Human niini, gi-harass na usab ang mga staff sa kongresista nga nag-opisina gawas sa buhatan. Tungod niini, buot ang mga kapitan nga manubag si Chan sa ilang gihulagway nga pagpasulabi sa iyang gahom isip mayor sa dakbayan.
“Mura mag pagkahuman ato (mga panghitabo) ang continuity sa programa sa kongresista naputol na tungod sa mga problema nga gisirad-an unsa pa na unya serbisyo man kaha ato tuyo ani? humana man unta ang eleksyon ngano man ni so nakalitan mi nga opisina raman unta unya naa nana diha since 2010,” matod ni Cuizon.
Gawas sa kaso sa Ombudsman plano usab sa mga kapitan nga mosang-at ug kasong kriminal batok sa mayor.
Si Chan sa iyang bahin dihang gikuhaan sa iyang habig mibutyag nga wala pa siya makadawat sa complaint gikan sa mga kapitan apan nakapangutana nganong nag apil-apil ang mga kapitan sa iyang pagpadagan sa syudad.
Matod niya daghang problema ang mga barangay sa dakbayan nga angayan atimanon sa mga kapitan inay ang pagpasaka ug kaso batok kaniya.
“Nganong sila may mokiha labot diay sila sa akong opisina sa city hall dapat focus sila sa ilang trabaho, ang mga kapitan duna man silay kaugalingong barangay hall, ang dunay full control ngari ang mayor man unya ug problema ang hisgotan naay problema sa city hall naa say sa barangay ayaw lang sila paapila sa problema..” matod ni Chan.
Nasayran nga 2 lang sa 30 ka mga barangay kapitan ang nailhang kaalyado ni Chan ug 28 kaalyado ni Radaza. (GCM)