GIPAHINGUSGAN pa sa kapulisan sa Central Visayas ang ilang intelligence monitoring human makadawat og impormasyon si Police Regional Director Brigadier General Debold Sinas nga adunay naabot sa Sugbo nga 50 kilos nga gituohang shabu gikan sa Dakbayan sa Marawi niadtong Agusto.
Ang 22 kilos niini ila nang nasakmit hinungdan nga nakatala silag P170 million nga balor sa illegal nga drugas sa ilang anti-drug operations gikan sa Agusto 1 hangtod sa Septiyembre 10.
Ang mga nangadakpan nila pulos ningtumbok sa usa ka source nga maoy leader sa drug group nga nagbase kaniadto sa Siyudad sa Talisay.
Wa nganli ni Sinas kinsa ang drug personality nga human sa ilang subsub nga kampanya sa milabayng tuig, niadto sa Dakbayan sa Marawi.
“Daan nga supplier na siya diri. Tapos gigukod nadakpan nakapag-bail pero wala na diri, toa na sa Marawi. Sa nag Marawi based na siya mao nang nag coordinate nami didto kung unsaon namo pagdakop.” Matod ni Police Brigadier General Debold Sinas.
Lig-on pa ang network sa maong drug lord dinhi sa Sugbo hinungdan nga magpadayon ang supply sa illegal nga drugas gikan sa Marawi. Nitug-an si Sinas nga adunay tulo ka drug group nga nag lihok sa Central Visayas, usa ang drug group leader nga toa sa Marawi nisibat.
Wa usab motug-an si Sinas kon giunsa sa pagpadala sa illegal nga drugas paingun sa Sugbo, apan nasayod na sila kon giunsa. Gikan pa gihapon sa Manila ang supply ug gibyahe lang paingon sa Marawi una dalhon sa Sugbo.
22 kilo
Sa P170 million nga drugas nga nasakmit sa kapulisan gikan Agusto 1 hangtod Septiyembre 10, ang labing daghan nasakmit sa kapulisan sa siyudad sa Sugbo. Moabot og P92 million ang nasakmit sa Cebu City Police Office (CCPO).
Nagpasabot kini, matod pa ni Sinas, nga daghan pa gihapon ang supply nga nangabot sa rehiyon 7.
1.8 kilo
Samtang nakasakmit ang mga sakop sa Mambaling Police Station og P12.2 milyones nga balor sa illegal nga drugas atol sa ilang buy bust operation sa sitio Galilee, Barangay Duljo Fatima, Dakbayan sa Sugbo, niadtong Martes sa alas 6:45 sa gabii, Septiyembre 10.
Ang nasikop giila nga si Ariane Ann Vergara Reyes, alyas Yan, 27, nagpuyo ra usab sa maong lugar. Nalakip si Reyes sa high value target regional level mao nga niabag ang Police Drug Enforcement Group 7 ug City Drug Enforcement Unit sa buy-bust.
Nakuha gikan kaniya ang usa ka extra large nga putos sa gituohang shabu ug sa sulod sa bag aduna pay laing 15 ka bulto nga motimbang ang tanan og sa 1.8 kilos. (AYB & BBT)