MILUWAT si coach Yeng Guiao isip head coach sa Gilas Pilipinas, usa ka adlaw gikan sa ilang paghiabot human sa ilang masulob-on nga kampanya sa Fiba World Cup diin wa silay gidag-an sa lima ka duwa, sagad niini gipanglubong.
Ang 60 anyos nga Guiao nangayo og despensa sa ilang bati nga performance sa prestisyusong kompetisyon diin milangdig ang nasod sa katapusan ug ika-32 nga luna.
Sa samang higayon, iyang giangkon ang tanang mga pagbasol sa nahitabo ug midayeg sa gipakita sa iyang mga players nga nakigkombati batok sa mga dagko, baskog, hanas nga mga players gikan sa laing mga nasod nga adunay sangkap sa preparasyon.
“I knew what conditions existed, what the limitations were, and still, I accepted the challenge. I hold myself responsible for the consequences,” matod ni Guiao sa iyang suwat nga gipadala sa Samahang Basketbol ng Pilipinas (SBP) kagahapon.
Dugang sa multi-titled coach nga anaa na karon sa mga kamot sa SBP ang sugod sa pagpahaom og programa aron makab-ot ang tinguha nga makakombati ang nasod sa mga maayong laking teams sa tibuok kalibutan.
Sa niaging adlaw sa paghiabot sa Gilas gikan sa Beijing, si Guiao nakighimamat ni SBP president Al Panlilio, vice-chairman Ricky Vargas ug chairman emeritus Manny V. Pangilinan diin gipadayag sa coach nga adunay kausaban nga iyang karong gisugdan.
Apan sa wala damha, kini mao diay ang iyang pag-resign.
Gisaysay usb ni Guiao nga ang iyang ikaduhang pagdala sa national team - diin ang una niadtong 2009 Fiba Asia Championship sa Tianjin, China - nahitabo sa dihang nahimutang ang team sa krisis aron paghimuntar og balik sa programa sa Gilas human sa nahitabong karambola niadtong Hulyo 2018 batok sa Australia.
Tungod sa pagkasuspenso sa mga coaches ug sa mga star players, si Guiao, kinsa maoy napilian sa SBP ug sa PBA nga mopuli ni coach Chot Reyes, naghulma og team nga gilangkuban sa pipila ka mga players sa Rain or Shine, ang team nga iyang nagiyahan ngadto sa ikalimang puwesto sa 2018 Asian Games sa Indonesia.
Ilang giharos ang Qatar ug Kazakhstan sa final window sa qualifiers aron makahulbot og ticket paingon sa World Cup.
“It is in this context that I view my year of leading this program in a positive light,” dugang sa seven-time champion coach sa PBA. “The efforts and sacrifices of all those involved, overcoming the many trials and tribulations, putting ourselves on the world stage of basketball – I can only wish we could have performed better these past two weeks, but the odds were stacked against us. Nonetheless, I take full responsibility.” (JBM)