SUKAD pa niadtong uwahing bahin sa tuig 80s permi ko na siyang ikakuyog sa matag higayon nga aduna kami out-of-town coverage.
Ang National Inter-collegiate basketball tournament nga niadtong panahona ipahigayon sa nagkalainlaing rehiyon sa nasod, maoy nahimo namong paboritong event nga kuyogan sa pag-cover.
Samtang siya maoy ipadala sa The Freeman, ako usab ang magrepresentar sa Newstime Daily, hangtod nga nitapon ako sa Sun Star Daily (SunStar Cebu na karon) ug sa kasamtangan nga Superbalita Cebu.
Hataas ang among kasinati-an, ug tuod man, nahimo siyang usa sa akong mga suod nga higala sa kalibutan sa panuwat sa natad sa paugnat sa kusog.
Akong gitumbok mao si Gabby “Haskang Buanga” Malagar, kinsa sa kalit lang mipanaw sa laing kalibutan niadtong Septiyembre 8, ang petsa sa kasaulogan sa adlawng natawhan ni Mama Mary.
Ang cancer sa iyang pantog maoy mikabig kaniya ngadto sa hinanaling kamatayan.
Ang pulong nga “hastang buanga” maoy nahimong trade mark ni GabMal, kay mao man gyud kini ang iyang madali-dali ug perming malitok ilabi na sa matag higayon sa among panagtapok-tapok.
Dili problemang ikasabot, mahigalaon, maabi-abihon apan aduna usab siyay kinaiya sa pagka maikugon.
Tungod niining maong mga hiyas, si GabMal, kinsa maoy pinaka senior sa mga sports writers sa Sugbo, nakaani ug daghang mga higala.
Dili lang sa mga okasyon ikauban ko siya, kon dili pipila usab ka higayon, nga kami rang duha mag-atubang og tagay samtang sa panahon kami magpalabay.
Tuig 1988 unang higayon ako nga nag-cover og basketball ug mao usab kining unang higayon nga una ko siyang gihimamat. Gani, isip bag-o pa sa akong karera, siya ang nahimo nakong gabay niadtong higayona.
Midagan pa ang daghang katuigan, nga permi ko na siya gikauban ug katapusang namong out-of-town coverage kaniadto lang Hulyo 7 didto sa Tagbilaran City atol sa usa ka boxing promotion.
Human niadto, mao na lay nadunggan nga si GabMal permi na malandig sa ospital, ug usa ka higayon niana, sa wala ko damha, sa kalit lang kini siya mibisita kanako sa Sun.Star, pipila ka adlaw gikan sa iyang paggawas sa tambalanan.
Wa ko magdahom nga kadto mao na diay ang katapusan namong panag-atubang kay lagi hingpit na man siyang mitaliwan. Wala na si GabMal.
Gab, anaa na sa imong dugo ang pasyon sa panulat. Just continue writing in Heaven, and you will be remembered as what Kenny Rogers said in one of your favorite songs “Through the Years.”
Rest in peace, my friend. (jun.migallen22@yahoo.com)