DUHA ka pakete sa gituohang shabu ang nasakmit sa usa ka Sangguniang Kabataan chairman mga alas 8 sa gabii niadtong adlaw’ng Lunes, Septiyembre 9, sa Barangay Daan Lungsod, dakbayan sa Gingoog, Misamis Oriental.
Si Police Lieutenant Colonel Ariel Phillip Pontillas, hepe sa Gingoog City Police Station, niila sa dinakpan nga mao si Renato Mejorada Jr, 24, ulitawo, SK chairman sa nasangpit nga barangay.
Mikasa og operasyon ang kapolisan uban ang Philippine Drug Enforcement Agency (PDEA)-Northern Mindanao hilabina nga gikonsidera si Mejorada nga high-value target.
Positibong napalitan sa pulis nga nagpatuong poseur buyer ug usa ka pakete sa gituohang shabu nga mobalor og P1,000 isip marked money.
Matud ni Police Lieutenant Colonel Pontillas sa SunStar Superbalita nga user ug pusher ang gikalambigitan niini ug taod-taod nga gi-monitor.
Detinado na karon sa Gingoog Police Station ang dinakpan kinsa gitakdang mag-atubang og kasong kasupakan sa Repuublic Act 9165 kon Dangerous Drugs Act.
Ang mga nakumpiskang ebidesnya gikan sa posisyon niini gitakdang dalahon sa Philippine National Police Crime laboratory alang sa masusing eksaminasyon.
Sa iyang bahin, wala sab gikalipay ni Mayor Erick Cañosa ang gikalambigitan sa usa ka SK chairman nga mao unta ang maayong ehemplo sa kabataan apan maoy niuna pagtukmod ngadto sa ilegal nga kalihokan.