MOKANTIDAD P3 milyones ang pundo sa unang phase sa Bulilit Center nga gi-groundbreaking niadtong adlaw’ng Lunes, Septiyembre 9, tapad sa Provincial Capitol.
Nahatagan kini sa katumanan sa pagpaningkamot ni Provincial Early Childhood Care and Development Officer (PECCDO), si Ms. Maryden Ocot, kinsa dako og kasing-kasing sa pagpalambo sa abilidad ug pagbaid sa ilang pagtulon-an sa mga bata nga madala nila hangtod sa ilang pagdako.
Gipasabot ni Misamis Oriental Governor Bambi Emano nga ang Bulilit Center nagikan sa national funds ug unang phase sa 1st floor nga bahin moabot sa P3 milyon, samtang laumang matibawas ang 2nd phase niini tuig 2020 sa sunod nga budget.
Gawas nga mahimong tunghaan sa mga kabataan nag edad 3 anyos paubos, magsilbi sab kining bag-ong buhatan sa ECCD.
“Nganong nagsugot ko nga itukod sa kilid sa Kapitolyo? Kay nakit-an nako unsa ka bililhon ang Bulilit Center, tungod kay duna silay klase diha buntag, udto, hapon. Nasabot sa gobyerno nga kamo dunay anak nga gaeskwela ug makabalda sa trabaho. Pwede ninyo mabilin dinha sa Bulilit Center. Naa moy apo dili mobantay pwede mapaeskwela diha,” Matud ni Emano.
Tungod kay gikan kini sa national ang pundo, dili lang limitado sa mga anak sa empleyado. Apan, kasikbit nga ahensya ang makabenipisyo niini.
Gidayeg sab niini ang pamunoan ni Ocot nga dako kaayo og papel sa pagpalambo sa abilidad sa kabataan, ug malaumon kining dugang kadasig ug dugang pundo pa ang makuha niini aron pagpalambo sa buhatan.
Atol sa misa ug ground breaking rites gipangunahan kini ni Father Juliano Retiquez, uban si Emano nga giduyogan sab sa mga opisyales sa Sangguniang Panlalawigan nga sila Board Member Gerardo Sabal III, Board Member Dexter Yasay, Board Member Leonard Winstanley, Board Member Kerwin Soldevilla, ug bag-ohay pa lang nahimong miyembro sa Sanggunian, si ex-officio Board Member Mitchele Anayron sa Philippine Councilors League.