ANAA na sa deliberasiyon ang gisugyot sa tsirman sa environment pagdesignar sa mga tanod sa mga barangay sa dakbayan sa Cagayan de Oro aron maoy hugot nga magbantay sa mga nakalapas sa ordinansa kalabot na sa paglabay og basura.
Gibutyag ni konsehal Enrico Salcedo, tsirman sa environment, nga sa pagsuroy sa palibot nasutang kulang og implementasiyon sa balaod ilabi na sa ordinansa kalabot na sa solid waste management.
“Pagsuroy nato sa mga barangay, kulang lang gyud og enforcement. That’s why para ma encourage nato ang atong mga tanod, atong i-deputized. Tagaan nato og incentives,” matud ni Salcedo.
Giingong kung dunay multa nga P500 ang 30 porsyento niini mapaingon sa barangay tanod ug ang 20 porsyento mapaingon sa barangay council.
Gidugang pa niini nga kung dili mapatuman ang ordinansa, ilabi na ang waste segregation, posibleng magproblema na usab ang siyudad ilabi na nga daling mapuno ang basurahan sa pagalungan ug dugang na usab nga gasto sa siyudad.
Nag-aghat usab kini sa katawhan sa siyudad nga seryusohon ang kampanya sa solid waste management.
Samtang suportado usab ni Vice Mayor Kikang Uy ang maong sugyot ilabi na nga duna nay kumpletong balaod ug ordinansa.
“Ang importante ang ngipon sa balaod unsaon man pag ngipon. Kung wala tay man power, kato siya pag ingganyo sa manpower nga ma-involve ang tao, ma-involve ang Barangay level para mas daghan ang mobantay,” matud ni Uy.
Giingong ang ordinansa ni Salcedo maglambigit kini sa mga katawhan ug sa barangay. Ang maong giduso nga sugyot anaa na sa joint committee sa environment, sa Barangay Affairs, sa ABC president, ug sa komitiba sa subdivision and land estate.