PANGUROS na lang daan sa higayon nga hulmigason imong dunggan tungod sa witik sa ilang dila. Wilik sa ilang laway lupig pa’y bendita samtang gahangos ug gatabisay apil ilang sip-on alang sa umaabot nga piniliay. Ay, suway ra’g paminaw anang dugdog ug kilat gikan sa mga kandidato!

Karon nga gaaligato ang kampana sa ilang kampanya, pastilan, kuyaw mapangag ug motak-om bisan ang demonyo nga galimugmog og kayo.

"The Manny Pacquiao Blog". Click here for stories and updates on the Filipino boxing champ.

Bahala na’g mangalisngaw ilang sampot samtang gapabulhot sa ilang lumba, wala ni sila’y gisantos aron dili mapaltos. Iyawat na lang mahimo silang humot atubangan sa ilang tigpaminaw, labi na kadtong humok og ilong.

Mao bitaw nga nanampong gyod si Juan Bolo, sakop sa Provincial Board (PB) sa Kapitolyo. Nangandam gyod siya aron malikayan ang makalanag nga pagpadayag sa ubang kandidato. Naa siya’y balaodnon nga giduso batok sa galaraw nga modasdas dutdot sa mga batan-ong botante diha sa seremonyas sa mga tunghaan panahon sa graduation. Ay, di gyod ra ba kuno magpapugong ang mga kandidato—moluhod samtang mag-ikid-ikid ug magtuwad—aron sangko sa langit ilang kahigayonan nga malabwan ang ilang kaatbang. Matod pa niya, “Politicians will do things just to gain the votes…”

Ay, hinumdomi ra kadtong nahitabo sa usa ka simbahan sa dakbayan sa Bogo pipila ka buwan ang milabay. Susmaryosep, diha’y usa ka kandidato nga mapangahason kaayong mibutang sa iyang hulagway duol sa altar sulod sa simbahan. Mao to nga gibendetahan tawon ang simbahan, iyawat na lang dili na hamokon sa panuway sa pamolitika.

Bag-ohay pa lang pod nagpahimatngon si DepEd Secretary Jesli Lapus sa mga kandidato. Iyang gihangyo ang mga politiko nga mosubay unta sa lagda sa Commission on Elections (Comelec) nga dili iangin ang mga tunghaan ug simbahan sa ilang pangampanya.

Taliwala sa pagpatuyang sa ubang politiko, angay tuod palandongan kining pangaliya alang sa piniliay gikan sa Brotherhood of Christian Businessmen and Professionals (BCBP).

Nia ang tipik gikan sa Tinagalog nga gihubad sa magbabalak ug huwes, Simeon Dumdum Jr.:

“Ginoo… panalangini ang umaabot nga eleksyon…Giyahi ang among pangisip aron among mapili ang angay nga mangulo sa among nasod:

Mga mangulo nga bayani nga mopatigbabaw sa kaayohan sa nasod ug di ang ilang kaugalingon. Mga mangulo nga mahibawong modumala aron maayo ang pagpadagan sa gobyerno. Mga mangulo nga tiunayng motuman sa mga buluhaton nga ilang gipanumpaan. Mga mangulo nga nagmatngon sa ilang dungog, ug di masuwawan sa gilak sa salapi, ug di mahadlok mobatok sa pangawkaw. Ug labaw sa tanan, mga mangulo nga Dyosnon ug kanunayng mosunod sa imong mga sugo.

Dungga ang among hangyo nga limpyo, malinawon ug mahinungdanon unta ang umaabot nga piniliay…”

Aber, tan-awon ta ko naa ba’y kandidato nga mosanong niining panalangin, dili dakdakan sa dugdog ug kilatan sa iyang pag-ingon, “Amen.” (geemyko@gmail.com)