GIKINAHANGLAN nga makatudlo gilayon ang Samahang Basketbol ng Pilipinas (SBP) og bag-ong head coach sa Gilas Pilipinas alang sa ika-30 nga edisyon sa Southeast Asian Games.
Kini tungod kay nagkaduol na ang deadline sa pagsumiter sa mga pangalan sa kompletong lineup sa team nga gikatakda sa hinapos nga bahin karong buwana.
Miabot og 30 ka mga pangalan ang pasiunang gisumiter sa SBP sa initial list sa mga players niadtong Hunyo diin nalakip ang naturalized players nga sila si Andray Blatche, Christian Stanhardinger ug Stanley Pringle.
Apan ang final nga dose ka mga player ug duha ka reserve kinahanglan nga masumiter na karong Septiyembre 30.
Ang Gilas Pilipinas, sa kasamtangan, wala na coach sa dihang miluwat si coach Yeng Guiao human sa makapasagmuyo nilang performance sa Fiba World Cup sa China diin permi silang gilubong.
Ang SBP wala pa usab makakuha og mga pangalan nga maoy ilang pili-an nga makapuli sa puwesto ni Guiao.
Hinuon, ang perming molutaw nga pangan o posibling maoy makandidato mao sila si Ateneo coach Tab Baldwin ug ang kasamtang coach sa Barangay Ginebra nga si Tim Cone.
Ang duha pulos nakahupot na sa maong position. Si Cone niadtong 1998 Asiad diin iyang nagiyahan ang national team ngadto sa bronze medal samtang si Baldwin sa 2016 Fiba Asia Championship diin nahimo silang runner-up.
Laing gikonsiderar si Rain orShine coach Caloy Garcia, kinsa nagsilbing assistant coach sa Gilas sa 2018 Asian Games hangtod na sa World Cup karong tuiga.
Sa wa pa mogikan sa China, si Guiao mipabuhagay nang daan nga kadtong wala madala sa World Cup sa China, otomatikong malakip sa lineup alang sa SEA Games.
Kini naglakip nila ni Beau Belga ug ang nanga-injured nga sila si Matthew Wright, Marcio Lassiter ug Poy Erram. Ang Pilipinas maoy perming modominar sa SEA Games basketball sukad niadtong 1991. (JBM)