TOLOSA, Leyte -- Patrol car sa kapulisan nakasugat og aksidente sa national highway sakop sa Barangay San Roque, Tolosa, Leyte, alas 9 pasado sa buntag, Huwebes, Septiyembre 12, 2019.
Ang maong patrol car iya sa Northern Samar Police Provincial Office-Mobile Force Company (NSPPO-MFC).
Ang sakyanan gimaneho ni Police Senior Staff Sergeant Archie Depaz.
Sakay niini ang laing upat ka pulis nga sila si Patrolwoman Genelyn Samante, Patrolman Mark Napoles, Patrolman Rommel Cugal ug Patrolman Roy Lendly Garcia.
Base sa inisyal nga imbestigasyon, gikan sa Baybay City, Leyte ang mga pulis paingon sa direksyon sa Tacloban City.
Pag-abot sa lugar nga nahitaboan, wala makontrolar sa drayber ang sakyanan, hinungdan nga nitipas kini sa wala nga bahin.
Nibangga sa usa ka poste ug paril sa panimalay nga iya ni Reynaldo Morales.
Nakaangkon og minor injury sa iyang kamot si Cugal, samtang wala maunsa ang iyang mga kauban.
Padayon pa ang imbestigasyon sa insidente. (JKDP)