SA IKATULONG higayon, moarangkada na usab karong tuiga ang Siomai Festival Fun Run isip usa sa mga dagkong kalihukan sa kasaulogan sa Siomai Festival sa Barangay Tisa, dakbayan sa Sugbo.
Pinasiugdanan sa Senior Citizens Association ug giabagan sa Marathon Organizers of Metro Cebu, ang kompetisyon ipahigayon karong Septiyembre 22, Dominggo, ug motadlas sa nag-unang dalan sa Barangay Tisa.
Gibahin ngadto sa tulo ka mga kategoriya ang mga managan. Kini mao ang Open Elite Runner A nga may siyam ka kilometro ang gilay-on, Executive Runner B nga moabot og unom ka kilometro ang daganan ug senior/student category nga adunay rota nga tres kilometros nga distansiya.
Ang registration fee P350 sa 9-K run, P300 sa 6-k run ug P250 alang sa 3-k race.
Ang tanang mosalmot makabaton og libring singlet ug race bib.
Si Joe Deresas, ang race director ug event organizer, mibutyag nga sugdan sa alas 6 sa buntag ang lumba nga manukad ug motapos diha atubangan sa Gaisanos-Tisa.
Mosumada ngadto sa P64,000 nga ganting salapi ang nakahan-ay alang sa mga mananog. Kini ubos usab sa pag-ayuda sa Cebu City Government ug sa Barangay Tisa Council.
Ang makita sa nahisgutang lumba maoy ihapak sa mga galastuhan sa mga kalingawan sa Siomai Festival 2019 nga magsugod sa Septiyembre 20 hangtod sa petsa 30.
Magpadayon ang pagpangrehistro kutob sa alas singko sa hapon sa Septiyembre 20. Ang registration adto ipahigayon sa Tisa Barangay Hall. (HBL)