SUPERBALITA CEBU

Popovich gisakitan

NAHASUBO: Maaninaw ang subo nga panagway nila ni US head coach Gregg Popovich (tunga), assistant head coach Steve Kerr (wala), ug Derrick White (tuo), sa dihang natataw na ang ilang kapildihan batok sa France sa quarterfinals match sa Fiba World Cup niadtong Miyerkules sa China. (FIBA.COM)

DILI ang pagbuntog lang sa Team USA kon dili ang paglangkat sa gold medal maoy anaa sa alimpatakan sa France sa nagpadayon nga 2019 Fiba World Cup didto sa China.

Kini maoy mensahe nga gipalanog ni Rudy Gobert kinsa maoy usa sa nahimong bayani sa France sa dihang ilang gipalagpot ang USA, 89-79, sa quarterfinal match niadtong Miyerkules sa gabii sa Dongguan, China.

“We came here to win gold,” matod ni Gobert. “We knew it wasn’t going to be easy. A lot of people counted us out, but we got the win.Beating the Americans wasn’t the goal — winning gold is. It doesn’t mean anything if you don’t win in the end.”

Ang kadaugan sa France naghatag kanila og luna alang sa semifinals round diin ilang makontra ang nagpaabot nga Argentina karong adlawa. Ang Argentina mitaktak usab sa laing title-contender nga Serbia.

Kini maoy unang higayon sukad niadtong 2016, nga ang US mipadala og mga NBA players sa international competition nga wala makaani og gold.

Si Evan Fournier mitali og 22 puntos samtang si Gobert midugang og 21 puntos, 16 ka rebounds, gawas sa iyang hugot nga depensa sa ilawom nga bahin diin iyang natapalan ang lusot nila ni Donovan Mitchell ug Kemba Walker.

Giangkon ni US coach Gregg Popovich nga nasakitan gyud sila sa kapildihan.

“Any loss hurts,” ingon ni Popovich. “And in this situation, it hurts more. But life goes on. This is very important and we would have loved to have won ... but we’re all grown, we all have families and lives and life goes on.”

Sa record, ang US adunay 58 ka sunodsunod nga daog sa Fiba ug Olympic competition nga nagsugod sa ilang pagdaog sa bronze medal sa 2006 world championships nga ilang nasumpayan ngadto sa Fiba Americas, World Cup ug Olympics.

Ang labing taas nga maangkon sa Team USA karon mao ang ikalimang puwesto, nga maoy pinakaubos nga maangkon sa team sukad niadtong 2002 world championships.

Mouli man tuod sila nga nakasiguro og luna alang sa 2020 Olympics apan way madala nga medalya.

Sa kasaysayan, ang France wa gyud makadaog sa US sulod sa siyam nila ka duwa diin sagad niini ipanglubong gyud sila.

Hinuon sa Rio de Janeiro Olympics 2016 igo lang nakalabaw ang US og tres puntos, 100-97.

Ang US ug Serbia maoy mag-abot sa consolation round nga giduwa kagabii.

Samtang sa laing quarterfinals match, nakapugnit usab og luna ang Australia sa semifinals round human nila malubong ang Czech Republic, 82-70.

Si Patty Mills nangulo sa Australia nga may 24 puntos, samtang midugang og 14 si Chris Goulding ug 10 usab ang natampo ni Andrew Bogut.

Ikasangka sa Australia ang Spain karong adlawa sa laing semifinal match diin ang modaog maoy makontra sa modaog usab tali sa France ug Argentina. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph