ALCEA MANINGO
Cangyan, Carmen, Cebu
HOW do I look?” ni Mira ngadto sa iyang kapikas nga si Charlie. May lakaw siya kay magpakuyog ang iyang mga apo nga manuroy sa plasa sa ilang lungsod. Mi-posing si Mira atubangan sa iyang bana.
“You look young and beautiful! Mora nag tin-edyer imong lihok. Mabatan-on sab kong magsud-ong nimo. Kinsa may imong gipaibgan?” matod ni Charlie nga morag nagselos ang tunada.
Nahitiurok si Mira ning sayong kahapunon. “Ha? Unsa god nang pangutanaha?” Nagmug-ot ang iyang nawong. “Tubaga lang!” ni Charlie nga seryusong mitutok sa kapikas.
Sa edad nga 60 batan-on pa tan-awon si Mira. Ang iyang mga higala moingon nga morag wa pa siyay 40. Nagpabilin man nga hamis, pino ug puti ang iyang kutis, ilabi na nga maayo siya modalag biste. Sa batan-on pa siya, nagtrabaho siya isip salesgirl sa New Meadow Emporium. Naasayin siya RTW section. Siya ang tigsukod sa mga bestida nga ideliber sa mga supplier. Ginganlan siyag ‘live manequin’ sa ilang manedyer nga si Gary. Husto siya sa gitas-on ug ka-slim sa lawas. Dinhi sila magkakita ni Charlie, nga maguwang niyag tulo ka tuig.
Hangtod karon bisag may tulo na ka apo, namintinar ni Mira ang iyang pigura. Pinangga man sab siya kaayo ni Charlie nga nakahatag niyag duha ka anak nga puro babaye. Mopahiyom lang siya kon dayegon sa mga higala. Apan molupa gyud ang iyang atay. Moburot pag-ayo ang iyang ego. Ang iyang kaanyag kaamgid sa kang Sofia Loren.
Sa ilang panagkaila ni Charlie, diha si Mira mlukmay sa kabuotan ug kakugihan ni Charlie. Si Mira taga Carmen. Nangambisyon si Mira nga makahuman og kurso nga di paggasto sa ginikanan. Si Charlie taga Badian. Nanarbaho si Charlie isip legal researcher sa usa ka abugado ug nag-eskuyla magabii. Hangtod nagalgal sa amo niya nga mokuhag abogasiya.
Mitanyag si Charlie nga kon sugton siya ni Mira, siya nay mogasto sa pagtuon ni Mira. Di na niya patrabahuon si Mira. Dihang nakagradwar na sila (kang Mira, Accountancy; kang Charlie, Political Science), nagpakasal sila. Mipadayon sa abogasiya si Charlie. Dangtag pito ka tuig sa ilang kaminyuon na-abugado si Charlie. Nahimo niyang sekretarya si Mira. Nagpatukod silag balay sa Baring, Carmen, dili layo sa munisipyo.
Karon semi-retire na si Charlie sa pagpanglaban. Nahuman nag mga kurso ang ilang mga anak ug nangaminyo na. Naglain na silag puyo ug magbisitahan nila sa weekend.
May namatikdan si Charlie sa kausaban sa lihok ni Mira. Mora na kinig tin-edyer. Kon dunay lakwon dugay kaayo maukang sa samin. Bisag moadto lang sa merkado kon dunay paliton o kon moadto sa plasa uban sa mga apo. Naniid sa hilom si Charlie. Morag dalaga si Mira nga may ulitawong gipaibgan. Samot na dihang nakatambong si Mira og reyunyon sa iyang ka-batch sa hayiskol, usa ka Dominggo niana. Upat ka lalake nga klasmeyt niya mikumpisal nga crush nila si Mira kaniadto apan wa lay kaisog sa pagpangulitawo. Ug si Elmo nga maoy nakauyab niya gustog formal closure kay wa kuno sila magkabuwag. “Nangapo na ta, uy! Unsa pa may closure imong gusto?” ni Mila.
“KINSA ba gyuy imong gipaibgan?” miusab pagpangutana si Charlie.
Nahipugwat si Mira gikan sa hamubong paghandom tungod sa sukna ni Charlie. Gitutokan niya ang iyang bana ug gipahiyuman.
“Siyempre, ikaw! Kinsa pa man diay? Hinuon, bisan asa ko mosuroy, heads are turning. Daghan pa ganing mo-attempt og pick-up lines. Pero inigka sayod nila nga abugado akong bana, mo-about face dayon,” ni Mira.
“Mao ba?” ni Charlie nga mapasigarbuhon.
“Proud ko nga may maibog pa nako. Apan layo ra man sila sa akong bana. Di diay ka proud sa akong beauty?” ni Mira.
“Of course, I’m proud of your beauty and being your husband!” ni Charlie.
“Mao nay tumong sa akong pagpangareglar sa akong kaugalingon,” ni Mira. Gihagkan niya sa ngabil si Charlie. “Babay na kay gipul-an nag hinuwat sa gawas ang atong mga apo.”
Kalit napukaw ang pagbati ni Charlie. Gihawiran niya si Mira ug gihagkan. Dugayng nagpilit ang ilang mga ngabil.
(KATAPUSAN)