DIA na sa Sugbo ang labing una ug nagbinugtong sa marine themed park, ang Cebu Ocean Park.
Dasok sa nagkadaiyang world class educational displays kansang tinguha maghatag og dugang kahibawo ug excitement ngadto sa park-goers, dili lang sa mga batan-on lakip na sa mga hamtong.
Gihulagway sab nga pinakalawom nga Oceanarium sa nasud ug di na kinahanglang mobiyahe pa sa bisan asang dapit aron masaksihan ang nagkadaiyang marine animals, kay gibuksan na sa publiko ang Cebu Ocean Park.
Niadtong Agosto 24 opisyal nang gi-ablihan ang maong facility nga nahimutang sa South Road Property, dakbayan sa Sugbo, (kilid sa SM Seaside City).
Dili magmahay ang makaduaw sa maong Oceanarium kay inyong masinati ang nagkadaiyang atraksiyon sud sa maong pasilidad nga susama sa Manila Ocean Park, samtang laing atraksiyon sab ang masaksihan sa gawas nga bahin sa niini.
Nasayran nga ang team nga mitukod sa Manila Ocean Park niadtong 2008 ang susamang team nga midala sa maong Oceanarium sa Sugbo.
RATES
Ang regular rate sa maong theme park mokabat sa P800 alang sa weekend ug holidays susama ra sab ang kantidad alang niadtong mga langyaw.
P600 kon weekdays alang sa mga lokal nga residente.
Samtang libre kadtong mga bata nga adunay gitas-on nga duha ka tiil pa-ubos.
MGA ATRAKSYON
Di mominos sa 1.5 ektarya ang gilapdon sa luna nga gitukoran sa Cebu Ocean Park diin sud sa maong pasilidad ang nagkadaiyang talan-awon.
Sa pagsulod nimo dinhi, imong makit-an ang nagkadaiyang koleksyon sa fresh water nga mga isda ug faunas diha sa Jungle Trek.
Ang maong matang sa mga isda sagad makita didto sa Amazon river, South America ug sa nasud sa Africa.
Naa sab sa Jungle Trek ang mga Australian lories ug lorikeets, klase sa langgam nga mahimo nimong malawgan.
Adunay reptiles ug insekto sab ang inyong makita Creepy Critters nga paniguradong makapanimbawot sa imong balahibo.
Dinhi imong mahikapan ang ilang iguanas ug bitin, apan off- limits sa ubang klase sa mananap.
Haom kaayo kini sa educational ug experiential tour dili lang sa mga tinun-an, lakip na ang pamilya.
Sunod nga imong masudlan mao ang Oceanarium nga anaa sa 7.2 metros ang gilawmon nga gisudlan og 3,500 ka cubic meter sa tubig-dagat.
Sud sa Oceanarium mao ang nagkadaiyang klase sa marine species nga imong makit-an sa 360 degree viewing tunnel.
Gipasigarbo sab sa management sa Cebu Ocean Park ang ila unyang animal shows sa umaabot.
Kahatagan og kahigayon alang niadtong dili mahadlokon nga makapaduol sa marine species pinaagi sa Sea Trek, ang pag-dive samtang ikaw nagsul-ob sa aqua helmet nga maglakaw sa Oceanarium.
Mahimo sab nimong mahikapan ang mga pagi sa ilang Stingray Interaction ug i-treat imong kaugalingon sa micro-massage aron sab matangtang ang mga dead skin o kubal sa imong mga tiil pinaagi sa ilang Fish Spa.
Kon ikaw mahilig og extreme adventure diay haom alang nimo kay mahimo sab nimong mahimamat ang 14-footer nga saltwater crocodile sa ilang Crocodile Cage.
SCHEDULE
Abli ang Cebu Ocean Park abli matag weekdays gikan sa 10:00 sa buntag hangtod sa 8:00 sa gabii samtang bukas kini sa 9:00 sa buntag ngadto na sa 6:00 sa hapon matag weekends.
Busa unsa pay gipaabot ninyo? Suroy na!