PATAS-AN kuno ang railings ug butangan og net ang kilid sa taytayan sa Mactan-Mandaue bridge aron nga mahunong na kining mga tawo nga buot maghikug nga mo-ambak sa maong taytayan. Nagtuo ba ang Department of Public Works and Highways (DPWH) nga makahunong kini sa mga tawong buot maghikug? Ako nagtuo nga ang mga tawong gusto gayud nga magpakamatay mo-ambak dili lamang sa Mandaue-Mactan bridge kon dili sa ubang mga taytayan. Anaay uban nga mu-ambak sa mga building, sa mga mall, poste, habug nga kahoy sama sa lubi ug ubang tag-as nga mga dapit. Ang uban maglaslas sa ilang pulso o kaha magpusil sa ilang kaugalingon ug ang uban magpaligis sa mga sakyanan. Daghang paagi sa paghunos sa kaugalingon nga mahimong himuon sa mga maghikug nga dili nato mapugngan pinaagi sa pagbutang og babag sa mga dapit nga ilang hikugan. Kon mao kini buhaton sa atong gobiyerno, mahurot ang oras niini sa pagbantay sa mga buot maghikug ug mag-usik lang usab kini sa buhis sa katawhan pinaagi sa pagtabon sa mga dapit nga adto sila magpakamatay.
Ang angay buhaton sa gobiyerno mao ang pag-awhag sa mga barangay nga monitoron ang ilang mga dapit nga adunay mga bata nga problemado. Ipahiling kini sila sa psychologist o kaha psychiatrist aron masayran kon aduna ba kini sakit sa utok, depression, attention deficiency syndrome o kaha drug addict ba kini. Dinhi nato mahatagan og solusyon ang problema sa mga batan-on aron dili sila modangop dayon sa paghikug kon dili sila matagad sa ilang mga ginikanan.
***
Makadaut ba sa mga tawo nga mokaon niining mga baboy nga nataptan sa African Swine Fever (ASF) kon kini ihawon bisan kon wa pa kini mamatay?
Namahayag man gud sa ubang mga health official nga dili makadaut sa panglawas sa tawo ang ASF. Kon mao kini nganong dili man lang tugutan nga mabaligya kining mga baboy nga ihawon bisan sa mga dapit diini gihugpaan sa ASF. Lahi kining patay na nga ibaligya gihapon kay makadaut na kini. Nangayo ako og katin-awan tungod kay maluoy ako sa mga namuhi og baboy nga naproblema tungod niining sakit nga ASF.
***
Gipahibawo ni Presidente Dutere nga gusto niyang wad-on ang mga customs examiner ug broker. Kini ang iyang gipasanginlan nga maoy naka-ingon sa kurapsiyon sa Bureau of Customs. Bisan kon tulo na ka mga pinili niyang mga tawo ang milingkud isip Customs commissioner, apan nagpadayon gihapon ang smuggling ug under-valuation sa Customs. Karong bag-o, adunay kapin sa 60 sa Customs personnel ang iyang gitangtang apan wa pa gyud tingali siya matagbaw sa performance sa Bureau of Customs. Kon ipadayon gayud sa Presidente ang dili pagpagamit sa mga broker ug examiner, daghan kaayo ang makulban sa kulon apil na ang mga corrupt nga Customs personnel.
(msr1144@gmail.com)