GIPANGUMUSTA ni Carding ang iyang amigo nga sa Delfin nga nipauli sa Sugbo gikan nga nanimpalad didto sa Manila, “Bay Delfin, kumusta ang ating hanapbuhay?” Tubag ni Delfin, “Buhay pa Carding, pero hanap.”
Kinaiya sa tawo nga maningkamot gyud nga mabuhi. Bisan sa taliwa sa kalisod, magpakabuhi gihapon. Sa kabukiran, mananamom og mga lagutmon nga maoy kaunon kon way bugas. Maningkamot aron dunay makaon.
Maminaw ta ining duha ka manag-amigo. Ang usa niingon, “Pait na gyud ang kinabuhi karon, bay. Sa among balay kaunom ko mokaon sa usa ka adlaw.” Matod pas iyang amigo, “Kaunom ka mokaon sa usa ka adlaw, pero nganong daut man kaayo ka?” Tubag pa niya, “Nganong di ko modaot nga duha ra man ka kutsara sa pamahaw, duha ka kutsara sa paniadto ug duha ka kutsara sa panihapon.”
***
Apan ang kalisod di igong hinungdan sa pagkutlo sa kaugalingong kinabuhi. Apan dunay mga ginagmay nga suliran nga alang sa hingtungdan lisod sulbaron. Pasiaw pa sa akong amigo, “How can you face your problem if your problem is your face?”
Mao kini hinungdan nga nagtagbo ang mga sakop sa Mactan-Cebu Bridge Management Board (MCBMB) niadtong Martes, Septyembre 10, 2019. Natala diay sa MCBMB nga niabot na sa upat ka mga tawo nga niambak ug namatay sa duha ka Mactan-Cebu bridge ning tuiga. Laing 17 ka mga tawo ang nisuway sa pagpakamatay.
Matag kinabuhi bililhon. Mao nga alang kanako, mga bayani kadtong mga pulis sa Mandaue, bisan wa nganli sa Sun.Star Cebu, nga nakakombinsir sa usa ka 16-anyos nga dalagita sa di pagdayon pag-ambak sa Marcelo Fernan Bridge niadtong Augsto 19.
***
Busa kinahanglan ang kanunay nga pagpatrolya sa mga pulis sa duha ka mga taytayan nga nagdugtong sa Cebu ug Mactan. Lisod saw-on ang molukso. Pero kon maabtan, kombinsihon nga di na lang molukso.
Si Cebu Gov. Gwendolyn Garcia, chairperson sa MCBMB, niingon nga napakyas ang traffic situation and monitoring system (TSMS) sa MCBMB sa pagmonitor sa maong mga kaso sa suicide.
Sa ubang mga tulay, sama sa Golden Gate Bridge sa San Francisco, California, USA, nga nitala na og kapin sa 1,500 ang nagpakamatay, gipamutangan og mga barriers aron masangit ang manglukso.