FRIDAY the 13th man diay karon. Matod pa sa mga karaan ug matuhu-tuhuon nga duol sa disgrasya ning maong adlaw ug petsa. O ba kaha dimalas. Dili man siguro, kon hugot lang ang atong pag-ampo ngadto sa Labaw’ng Makagagahum. Walay makalabaw Kaniya kon mag-ampo lamang kita. Kay Siya maoy naghimo sa tanan apil na ang mga yawa ug demonyo. Busa mag-ampo lang gyud kita aron malayo sa disgrasya.
MAAYONG PAMATASAN
Kon si Bise Mayor Michael Rama maoy pabut-on, gusto niyang tudluan og good manners and right conduct (GMRC) o maayong pamatasan ang mga kawani sa City Hall. Kay ngano man? Morag na-insulto ang bise mayor sa gihimo sa mga empliyado nga namiya niadtong programa sa miaging Lunes alang sa paghandum ika-141 ka tuig nga anibersaryo sa adlaw’ng natawhan ni anhing Presidente Sergio Osmena Sr.
Naobserbahan ni Mike nga nag-anam-anam og pamiya ang mga kawani bisan wala pa matapos ang programa ug pagkahuman sa pag-check sa attendance. Maayo lang kuno sa pagsugod sa misa apan sa dihang gisugdan na ang programa, hinay-hinay nang namiya. Morag walay batasan. Gusto niya nga sa sunod, mo-standby ug mo-unong hangtod mahuman ang programa.
Daghang rason nganong mamiya ang mga kawani. Una, basin gigutum sila kay ang uban wala pay pamahaw. Nangita og pagkaon. Ikaduha, basin dili gustong mabuwad sa init kay high blood. Atakihon pa lang sila. Ikatulo, basin wala ganahi sa programa kay laay kaayo sige paminaw og speeches labi pa kon si Mike maoy motabi. Di ka makasabot kay magtuyok-tuyok, dili makamao kanus-a mohunong.
Pero sa dili pa motudlo si Mike og maayong pamatasan sa mga empliyado sa City Hall, mas maayo siguro nga iya unang tudluan ang iyang kaugalingon. Nganong mobiya man pod siya kon mo-speech na si Mayor Edgardo Labella atol sa flag raising ceremony matag Lunes sa City Hall? Kon dunay mosugyot kaniya, nganong ingnon man dayon niya nga “Pagmayor sa, Do.”? Nganong iya mang paligig-liguron ang mga maestra ug mga barangay captain? Mas maayo siguro nga usbon usa niya ang iyang kinaiya.(bobbygnalzaro@gmail.com)