Sud lang sa 40 ka adlaw, P170 milyunes ang balor sa shabu nga nasakmit sa kapulisan ubos sa Police Regional Office (PRO) 7. Nagpasabot nga makasakmit ang kapulisan og average nga P4.2 million nga balor sa drugas matag adlaw sa nagkadaiya nilang mga operasyon. Dul-an na kini sa usa ka kilo nga shabu.
Matod ni PRO 7 Director Brig. General Debold Sinas nga usa ra ka tawo ang tinubdan niini nga kanhi nagpuyo sa Talisay, apan nibalhin na sa Marawi City human sa ilang hugot nga kampanya batok sa illegal drugs. Nakapalusot kini og 50 kilos, apan ang 22 niini ila nang nasakmit. Bisan tuod kon gikan sa Marawi City ang shipment, apan sa Manila ang tinubdan.
Mga tulo ka tuig kapin na sa katungdanan si Presidente Rodrigo Duterte, kinsa nisaad atol sa iyang kampanya sa eleksyon 2016 nga iyang sumpuon ang suliran sa illegal drugs sulod lang sa unom ka buwan.
Human sa unom ka buwan, nangayo siyag extension nga usa ka tuig, hangtod nga nakaamgo siya nga di diay simple nga problema ang drugas. Ang gamot niini lisod nang lukahon tungod kay nakakupot kini sa kurapsyon sud sa kagamhanan, kakabus ug kahakog sa tawo. Mahuman na lang si Duterte sa iyang katungdanan, ang suliran sa drugas di pa mahanaw. Wa gani kini mohinay bisan sa gihingusgan nga kampanya, unsa na kaha ang pagpapas o pagpaminos sa suliran?
Kon di tinud-on sa Presidente ang paghawan sa mga kurakot sa kagamhanan, diha sa Bureau of Customs, kapulisan ug Philippine Drug Enforcement Agency, nulo o way padulngan ang iyang kampanya batok sa illegal drugs. Mogawas nga maora lag mga buwa ang nagggawas sa iyang baba.
Daghan na ang gitumbok nga drug lords nga nangapriso, apan nakapadayon sa illegal nga negusyo. Duna bay dagkong opisyal sa kagamhanan nga nalambigit pagpayuhot sa illegal drugs nga napriso bisan klaro ang ilang papel? Wala.