ORMOC City, Leyte – Giklaro sa Ormoc City Traffic Enforcement and Management nga di pa nila ma-implementar ang pagdili sa mga one side ug two side parking sa dakbayan.
Kini bisan pa kon dunay memorandum gikan sa Department of Interior and Local Government (DILG) nga limpyuhon ang tanan public roads base sa mando ni Presidente Rodrigo Duterte.
Ang Dakbayan sa Ormoc dunay pipila ka ordinansa nga nagtugot og one-side ug two-side parking.
Matod ni Barnsby Cagang, labaw sa Team, lisod pa iimplementar ordinansa kay way ikatanyag nga alternatibong parking area ang Dakbayan alang sa mga motorista.
Nabalaka sila nga modako na hinuon ang problema.
Gani buot nila klaruhon kon apil ba ang gitugot nga one side parking sa limpyuhon.
“Actually, ang memorandum circular wala mosulti og parking sa mga streets, whether naay ordinances o wa. Gi put on hold usa ang pag revise ani nga ordinances until such time nga ang DILG i-klaro nila kon apil ba gyod ni sa mandate,” matod ni Cagang.
Dugang ni Cagang nga ang mga dagko nga syudad duna usab parking zones.
Nahisgutan usab sa C0mittee Meeting ni konsehal Goito Yrastorza ang kabahin sa nasunog nga Gaisano Capital sa dan Real nga giplanohan nga himuon nga parking building.
Matod ni Cagang nga mao unta kini ang maayo nga paagi apan di pa ma-demolish ang maong edipisyo kay kinahanglan pa og court order.
Hinuon, niadto pang buwan sa Hunyo gi-implementar sa syudad ang clearing operation sa tanan mga karsada nga dunay mga illegal structures ug nagpadayun kini hantud karon. (JKDP)