Editoryal: Umento sa suholan

Editoryal: Umento sa suholan

Ang Committee on Labor, Employment and Human Resources sa Senado nagpanday sa P150 nga umento sa minimum daily wage sa tanang pribadong sektor nga mga mamumuo sa tibuok nasod. Nindot kon matuman. Mas dako pa kini sa P100 nga umento nga gidemanda sa mga militanteng grupo.

Apan dili una nato ihurot ang paglaum.

Si Senate President Juan Miguel Zubiri gikutlo sa taho nga ang naasoy nga sugyot nga umento ‘approved in principle’ pa lang atol sa hearing sa Senado sa Miyerkules, Mayo 10, 2023, bahin sa Senate Bill No. 2022, o Across-the-board Wage Increase Act nga giduso mismo ni Zubiri.

Matod niya, ang technical working group giporma aron pagtuki sa sugyot nga graduated wage increase scheme o inanay nga pagpatuman alang sa micro, small and medium enterprises (MSMEs). Tungod niini, posible nga dakong kausaban tungod sa dili usab malalis nga ang gagmay nga mga negusyo apektado sa sunodsunod nga mga krisis.

Gawas pa, ang Ubos Balay-Balauranan mohimo pa usab og katugbang nga balaudnon bahin sa pag-umento sa suholan sa mga mamumuo. Apan segurado nga mag-agi kini sa uhalis sa dagom tungod kay gidominahan ang Kongreso sa adunahang mga negusyante o mga agalong yutaan nga kanunay nagdepensa sa ilang interes.

Ug base sa kasaysayan, way ingon kadako nga umento sa suholan. Kasagaran mosangko lang sa two-digit ug managlahi pa ang kantidad sa nagkalainlaing rehiyon. Ang Metropolitan Manila ug ubang dagkong mga dakbayan mas dako tungod usab sa taas nga cost of living sa maong mga dapit.

Apan kon mapatuman ang naasoy nga kantidad ug across-the-board pa, klaro nga daghan usab ang manira nga pamatigayon. Mapun-an ang pwersa sa way trabaho. Matod pa, maayo na lang nga dunay trabaho bisan gamay ang suweldo kaysa walay kita. Pagkalisod ibalanse.

Kini ang dakong papel sa kagamhanan. Masusi pag-ayo ang makiangayon nga umento. Samtang mopatuman sa hait nga dila sa balaod batok sa mga abusadong negosyante nga nagpahimulos sa mga mamumuo sa pagpaburot sa ilang bulsa. Bahinbahin lang sa grasya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph