PAGBAHA sa national highway sa mga barangay Bulacao ug Tabunok sa dakbayan sa Talisay, ilabi na kon adunay kusog nga pag-ulan ang hingpit na unya nga masulbad.
Kini human nga 60 porsyento na nga nahuman ang drainage nga gitrabaho sa Department Works and Highway (DPWH-7), sa habig sa Bulacao, Talisay CIty.
Gitug-an ni Engr. Lesley Molina sa DPWH-7 sa 2nd engineering district nga nakatunga na sila sa pagpatrabaho sa drainage kon ang lutsanan sa tubig diha sa barangay Bulacao.
Kahinumdoman nga grabeng nakabaha sa dan N. Bacalso sa maong duha ka mga barangay niadtong Agusto, human sa pagbunok sa kusog nga ulan.
Ug usa sa nakita nga solusyon ang insakto nga lutsanan sa tubig.
Matud ni Molina nga aduna gyud drainage sa lugar apan hinay ang dagayday sa tubig gumikan kay lahi ang elevation paingon sa sapa.
Ug nisamot pa kini kahinay tungod sa mga basura diha lang gipanglabay sa kanal, nga maoy nakabara.
Niadtong Agusto, daling nakaresponde sa taga tuhod na nga baha sa national highway sa duha ka barangay ang mga sakop sa Aksyon Agad, nga maoy nanguha ug nanglimpyo sa mga basura nga nibara diha sa estero.
Tungod sa maong baha usab, gihangyo sa mayor ang DPWH, alang na sa pagpahuman sa kanal, nga kaniadto napaundang tungod usab sa problema sa mga illegal settlers nga nakaali.
Apan gitug-an ni Mayor Gerald Anthony Gullas nga napangitaan og laing kaagian sa kanal aron hingpit na gyud kini nga mahuman, nga dili ra maapektuhan ang nanimuyo kay wala pa usab nakit-an nga relocation alang kanila.
Apan matud ni Molina nga bisan kon unsa pa kadaku nga kanal ang himuon kon pabilin nga magpabaya ang publiko ug magpataka lang sa paglabay sa ilang basura, ang problema sa baha ang magpadaon. (FMD)