BANSALAN, Davao del Sur -- Sa pinakaunang higayon, himuon sa tanang barangay sa lungsod ang “Litsonan” atol sa kulminasyon sa ika-67 Araw ng Bansalan sa Septyembre 18.
Miabag og tag P2,000 ang lokal nga gobyerno ug ang barangay na ang moabaga sa ubang galastuson alang sa pag-apil sa kontes diin adunay gitanyag nga ganti.
Moabot sa 25 ka mga barangay sa lungsod ang mohikyad og litson sa ilang matag booth ug ang ika-26 nga booth mao ang sa mga Indigenous Peoples (IPs).
Unahon pagsusi sa mga hurado kon kinsa ang pinakalami nga gilutong litson ayha pa kini ipakaon sa ilang mga bisita.
Samtang, gipangunahan ni acting Mayor Eugene Clata ang pag-abli sa usa ka semanang selebrasyon adlaw’ng Huwebes, Septiyembre 12, pinaagi sa Agri-Trade Fair.
Karong adlawa, hatagan sab og pasidungog ang tanang mag-uuma pinaagi sa pagsaulog sa Agriculture Day.
Gihulagway nga simpol lang ang pagsaulog sanglit giwagtang sa lokal nga gobyerno ang “Mutya ng Bansalan” tungod kay way igong pundo.
Duna say gilusad nga duwa sa basketball matag gabii nga gisalmutan sa mga nagkadaiyang ahensiya sa lokal nga gobyerno ug mga institusyon.
Hinuon, gawas niini mamahimo sab nga mosuroy ang katawhan sa gipahimutang nga peryahan.
Nanghinaot si Clata sa kooperasyon sa katawhan ilabi na sa pagbantay sa palibot ug giawhag ang matag indibiduwal nga motaho gilayon ngadto sa kapulisan ugaling dunay mamatikdan nga mga katingad-ang mga tawo ug butang sa palibot.
Nahimutang ang lungsod sa utlanang bahin sa probinsiya sa North Cotabato diin adunay gimuntar nga checkpoint sa katapusang barangay niini nga mao ang Kinuskusan. (Orlando B. Dinoy)