TACURONG CITY -- Samaron ang barangay kapitan human gipunting sa mga wala mailhing suspek alas 9:02 sa buntag, Miyerkules, Septiyembre 11.
Giila ang biktima nga si Mosaid Kandatu, kapitan sa Barangay Pimbalayan, Lambayong, Sultan Kudarat.
Gibutyag ni Police Major Ronnie Daldo, tigpamaba sa Sultan Kudarat Police Provincial Office, nga nagdumala ang kapitan og kalihukan sulod sa barangay basketball court sa dihang nahitabo ang pagpamusil kaniya.
Sumala pa nga kalit lang nibutho ang duha ka mga lalaki ug gipusil ang kapitan tumong sa iyang tiyan.
Nisulay pa unta og bawos ang mga barangay tanod batok sa mga suspek apan daling niikyas sila kinsa pulos dunay taptap nga panyo ang mga dagway.
Gisapupo gilayon ang kapitan ug gihatud ngadto sa balay tambalanan sa Tacurong City nga wala gibutyag sa mga awtoridad.
“This is more of a personal grudge involving the village chairman and an unidentified family,” segun ni Daldo.
Hinuon padayon pang gisubay sa kapulisan ang maong hitabo. (Edgar E. Fuerzas)