PADAYON pang gisuta sa mga awtoridad ang motibo sa pagpusil patay sa usa ka 33 anyos nga lalaki alas 8:44 sa gabii niadtong Martes, Septiyembre 10, sa Purok 12, Concordo Compound, Lower Lubogan, Barangay Lubogan, Toril District, dakbayan sa Davao.

Ang biktima giila nga si Chrislier Delfin Laguma, minyo, ug molupyo sa nahisgutang dapit.

Sa inisyal nga imbestigasyon sa Toril Police Station, nasayran nga sa wala pa mahitabo ang insidente, giingong ang biktima, kauban sa usa ka babaye, nagtupad og lingkod sa traysikad (payong-payong) nga giparada subay sa dalan.

Apan usa ka wala mailhing lalaki kalit nga ninaug sa gisakyan nga motorsiklo sa likod nga bahin nga armado og armas ug way daghang langas, gipusil ang biktima sa makaduha ka higayon tumong sa ulo hinungdan sa hinanali niining kamatayon.

Gihulagway sa mga awtoridad nga ang suspek dunay gitas-on nga 5’4”, medyo gamayon og lawas, nagsul-ob og pula/yellow nga jersey #32 ug nigamit og t-shirt aron nga tabunan ang iyang dagway.

Human sa hitabo, ang suspek daling mibiya sa lugar sakay sa wa masayring matang sa motorsiklo nga gimaneho sa wa sab mailhing drayber nga nagsul-ob og semi-half faced nga helmet, pula ang t-shirt, maong ang pantalon ug nisibat padulong sa wala masayring lugar.

Patay nga lawas sa biktima gidala ngadto sa Angel Funeral Homes, dalang De Guzman, Toril, alang sa otopsiya.

Sa pagsusi sa personahe sa Scene of the Crime Operatives (Soco) pinangulohan ni Police Captain Lauriano Pajente sa nahitaboan, duha ka basiyo sa bala nga gituohang gikan sa kalibre .45 nga pistola ang narekober ug naa na karon sa kustodiya sa Soco 11 alang sa cross match examination.

Hinuon, ang kapulisan sa Toril PNP padayon pang nihimo og dugang imbestigasyon aron nga mailhan ug madakpan ang mga suspek.