P1.2 milyon nga 'shabu' nasakmit

MOBALOR sa P1.2 milyones nga kantidad sa gituohang shabu nasakmit gikan sa mga high-value target personality atol sa drug bust niadtong Septiyembre 9 mga alas 8:00 sa buntag sa Barangay Suarez, Iligan City, Lanao del Norte.

Ang operasyon hiniusa gikan sa Philippine Drug Enforcement Agency (PDEA)-Northern Mindanao sa pagpangulo ni Regional Director Wilkins Villanueva, Iligan City Police Office ug operatiba gikan sa Lanao del Norte Police Office ug Camiguin Police Office nga miresulta sa pagkasikop sa duha ka mga high-value target nga giilang sila si Mahdi Lucas Mapandi, 40, minyo, residente sa Sagrayan, Lanao del Sur, ug Cosary Amintao Azis alias Mama Arab, 25, minyo, taga Matampay, Marawi, Lanao del Sur.

Nakumpiska gikan sa ilang mga posisyon ang mokabat P1,200,000 nga gibana-banang kantidad sa gitouhang shabu kon asa sila unang napalitas og usa ka transparent plastic sachet sa gitouhang shabu, laing duha ka dagkong pakete nga gihikot nga adunay gibug-aton 250 gramo.

Narekober sab sa posisyon ang usa ka marked money mobalor P1,000 ug laing lima ka mga tag P1,000 nga boodle money gigamit sa buy-bust.

Ang mga dinakpan taod-taod na nga gimonitor ug giberika ug positibo nga padayon sa pagpayuhot sa ginadili nga druga hinungdan nga giambakan sa mga operatiba.

Tanan nga mga nakumpiskang ebidensya ang gikatakdang susihon ug eeksamin sa PDEA Regional Laboratory Office, samtang mga dinakpan nagtingkagol na karon panahona ug mag-atubang og kasong kasupakan sa RA 9165 kon Dangerous Drugs Act.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph