NAGPAGAWAS og kamandoan si Misamis Oriental Governor Bambi Emano nga temporaryo usa nga pugngan ug dili pasudlon sa probinsya sa Misamis Oriental ang mga nagkadaiyang matang sa produkto nga baboy sa ka risgo sa sakit nga African Swine Fever (ASF).
Gipirmahan sa gobernador ang executive order 2019-13 niadtong Miyerkules kon asa unod sa maong kamandoan mao ang pagtukod sa Task Force ASF MisOr nga maoy mosusi ug mobabag sa mga mosulod nga mga karneng baboy o binuhing baboy sa lalawigan.
Niadtong Lunes nagpahibalo si Department of Agriculture Secretary William Dar nga adunay mga report kalabot swine mortality sa probinsya sa Rizal ug Bulacan, hinungdan nga ila kining gikuhaan og sample ug gipaubos sa Confirmatory Polymerase Chain reaction test ug nakumpirmang positibo.
Tungod niini, nagmando si Emano nga magmugna og task force nga maoy motutok dinhi sa probinsya ug makigtambayayong sa National Meat Inspection Service-Northern Mindanao, National Veterinary Quarantine Station-Northern Mindanao, Food and Drug Administration, local government unit ug uban pa nga ahensya.
Hulatan lamang ang direktiba gikan sa Bureau of Animal Industry nga luwas na ang nasud sa maong sakit usa kini wad-on nga kamandoan.
Hinuon, si Misamis Oriental Provincial Veterinarian Dr. Benjamin Resma nipasalig nga luwas ang karneng baboy nga nagikan dinhi sa lalawigan ug siyudad sa Cagayan de Oro ug aron nga mapamatud-an kini karong adlawa dungan sa adlawng Biyernes nga Farmer's Market, giimbitahan niini ang tanan nga salmotan ang ilang boodle fight kon asa ang himuong sud-an ang 200 kilos nga nilutong baboy.
Basi sa record, moabot ngadto sa P265 bilyones ang economic value sa swine production sa nasod ug 65 porsiyento sa hog raisers nagikan sa backyard farming.
Ang 35 porsiyento mga commercial farmers ug ikatulo ang Northern Mindanao nga pinakado nga swine producers sa nasod.