IPATAWAG sa tsirman sa komitiba sa sektor sa mga negosyante ang organisasyon ug mga security agency, kini human nasikop ang usa ka guwardiya nga nanulis sa usa ka spa niadtong nilabay nga adlaw sa Barangay 34, siyudad sa Cagayan de Oro.
Nasayran nga nasikop ang guwardiya nga si Romnick Masayon, 26, ulitawo, lumad sa Masipang Rizal, Zamboanga del Norte, ug kasamtangang residente sa Barangay Balulang human kini nadunggaban sa dihang nisulay og pagpanulis ug gitumbok nga responsable sa sunod-sunod nga pagpanulis sa maong dapit.
Gikabalaka kini sa negosyante nga nabiktima nga spa ilabi na nga usa ka guwardiya ang nihimo niini rason nga nagpatabang sa konseho ilabi na sa tsirman sa sektor sa mga negosyante.
Sa pakighinabi ngadto na kay Konsehal George Goking, tsirman sa trade and commerce, gikabutyag nga ipatawag niini ang hingtungdan nga ahensiya apan kinahanglan una nga dunay magduso o magpadala og pormal nga reklamo ngadto kaniya aron nga maaksiyonan.
"Padala mo og complain sa ako para akong tawgon ang organization o agency para Kung naa silay kalapasan we will move to recommend cancelation of the business permit, risky biya ang kinabuhi," matud ni Goking.
Gidugang pa niini nga walay lugar sa siyudad ang mga ahensiya o negosyante nga dili mopatuman sa balaod alang sa kaluwasan sa tanan.