GIINGONG mokabat sa P25 milyones nga kantidad sa mga senior citizen nga biktima sa lain na usab nga scam dinhi sa siyudad sa Cagayan de Oro.
Posibleng matanggalan og business permit ug mag-atubang og kaso ang giingong pastor nga nangilad sa mga senior citizen ilabi na nga wala kini nipatim-aw sa gipatawag nga panagtagbo sa komitiba sa sektor sa mga negosyante niadtong Septiyembre 10.
Giingong duha ka mga senior citizen ang nipatim-aw nga nailad apan gikabutyag nga ubay-ubay kini sila ug usa niini ang nagpasaka na og reklamo.
Gibutyag ni Konsehal George Goking, tsirman sa trade and commerce, nga mga senior citizen ang gibiktima na usab niini ug nahurot ang ilang mga tinigom diha lamang sa mga pagpangilad ug binuang.
Giingong ang anaa sa business permit mao ang wholesaler/retailer kini sa herbal nga mga produkto apan lahi ang transaksiyon. Gikabutyag pa nga unang hayloon sa pagpalit sa produkto ug hangtod nga magtanyag kini nga mamuhunan kay lage dunay dakong tubo.
"Ang ilahang business permit herbal man unya ilang gisudlan investment dili man na insakto, ang usa P5 million, daghan daw na sila puros senior citizen ang gibiktima, so far P25 million," matud ni Goking.
Giingong kung dili kini mopatim-aw sa sunod nga pagpatawag, tanggalan na kini og business permit ug pasakaan og kaso.
Gidugang pa usab nga sutaon niini ang giingong produkto nga herbal kung akreditado kini sa Food and Drug Administration (FDA).
"Possible nga matanggalan sila og business permit ug mafile-lan silag kaso," dugang pa.