NASIKOP sa mga sakop sa Bohol Provincial Police Office inabagan sa Criminal Investigation and Detection Group (CIDG) 7 ang duha ka mga akusado sa pagdagit ug pagpatay sa babaying mayor sa lungsod sa Bien-Unido, lalawigan sa Bohol duha ka tuig na ang nakalabay.
Ang nangadakpan sa usa ka balay sa Barangay Basak, Siyudad Lapu-lapu, giila nga silang Allan delos Reyes ug Lobo Boniel, mga kabanay ra usab sa giakusahang mastermind nga si Board Member Niño Rey Boniel. Si Delos Reyes nalakip sa number 5 most wanted samtang si Lobo nabutang sa ika 4 nga most wanted person sa tibuok rehiyon 7.
Ang kapulisan sa Bohol armadog alias warrant of arrest nga giluwatan ni Judge Christine Muga Abad sa Regional Trial Court Branc (RTC) Branch 70 sa Siyudad sa Lapu-lapu sa kasong murder.
Ang giingong partisipasyon ni Lobo sa pagpatay kang Mayor Gisela mao ang pagplano unsay ilang angay nga buhaton.
Giingong diha usab siya sa paghimo sa krimen samtang si Delos Reyes mao ang giingong nihigot sa pisi sa mga kamot sa mayor ug mibato-bato sa pukot diin naa didto ang lawas ni Gisela hangtod nga naunlod sa kadagatan sa Lapu-Lapu.
Matod ni Police Colonel Jonathan Cabal, director sa Bohol Police Provincial Office, nakakuha ang iyang mga sakop og usa ka kalibre .45 nga pistola ug mga bala niini lakip na ang uniporme sa pulis nga ilang nailhan nga iya ni Police Patrolman Nico Ababon.
Dinhi ilang nahibaw-an nga ang balay nga gipuy-an ni Logo iya ni Ababon.
Sa ilang nasayran ang live in partner ni Lobo igsuon sa live-in partner ni Ababon. (AYB)