KAPIN sa P1 million nga balor nga shabu ang nasakmit sa managlahi nga mga operasyon sa Cebu City Police Office sa Huwebes sa kaadlawon, Septiyembre 12.
Gawas siyam ka mga tawo nga nasikop sa CCPO, ang Talisay police nakadakop usab og 10 ka giingong drug pushers.
Lakip sa mga nadakpan ang usa ka lapida maker sa Barangay Carreta nga gi-buy-bust sa mga sakop sa City Drug Enforcement Unit (CDEU) sa CCPO sulod sa sam-ang sa Barangay Carreta.
Ang suspek mao si Brian Sinet Catacutan, hingkod, lumolupyo sulod sa sam-ang sa Barangay Carrreta nga nakuhaan og kapin sa P200,000 nga balor sa gituohang shabu.
Si PLt. Mariel Ann Piedad, labaw sa City Drug Enforcement Unit sa CCPO, maoy nangu sa pagpangronda pasado alas 2 Huwebes sa hapon.
Gawas kang Catacutan, nadakpan usab si Fritzel Lisondra, alyas Inday, 34, taga Sitio Camagong, Barangay Lahug.Nakuha kang Lisondra ang P475,000 nga balor shabu.
Nadakpan usab ang laing HVT nga si Rezan Jenifer Epili, 27, taga NRA, Barangay Mabolo ,ug Ariel Villegas, 28, taga Barangay Mabolo.Ang duha nakuhaan og P102,000 nga kantidad sa shabu.
Samtang si Genesis Betcher, 26, giingong HVT, taga Sitio Brookside Valley, Barangay Lahug, nasakmitan og P136,000 nga balor sa shabu gikan sa iyang posisyon atol sa buy-bust operation.
Si P/Maj. Joemar Pomarejos, hepe sa Waterfront Police, niingon nga dinagko ang transaksyon ni Betcher.
Lakip sa nasikop sa laing mga operasyon mao sila si Jean Paul Cañete, 36; Conception Lauron, 45; Ferdinand Diez, 42; Ernesto Diez, amahan ni Ferdinand; ug Angkong Abapo, 50.
Talisay
Napulo ka mga tawo nasikop, duha kanila mga menor de edad nga mga babaye sa duha ka managlahing lugar sa Barangay Tabunok, Dakbayan sa Talisay, Huwebes sa buntag, Septiyembre 12.
Unang operasyon gihimo sa sitio Sangi 1, Barangay Tabunok sa alas 11:05 sa buntag.
Ang operasyon gipanguluhan ni Police Captain Nazarino Emia, deputy chief sa Talisay City Police Station.
Gihimo ang buy-bust operation sa usa ka lodge sa maong lugar. (BBT & FMD)