SECTIONS
Friday, September 20, 2019
SUPERBALITA CEBU

Chan mohangyo kang Garcia sa bridges

SI LAPU-LAPU City Mayor Junard “Ahong” Chan may tulo ka mga hangyo kang Gobernador Gwendolyn Garcia mahitungod sa duha ka mga taytayan sa Mactan.

Tulo ka mga hangyo ang gilista ni Chan kang Garcia mahitungod sa mga limitasyon nga gipatuman sa duha ka mga taytayan nga nahimong sentro unsaon pagsulbad sa sunod-sunod nga pagpakamatay sa nahisgutang lugar.

Una mao ang pagpagamit sa duha ka mga pedestrian lane nga maoy sagad gamiton sa mga tinun-an ug trabahante nga muoli padulong sa siyudad.

Ikaduha mao ang pagtugot sa mga tawo nga molabang sa taytayan nga magbiseklita.

“Mohangyo ko sa gobernador kon mahimo o sa bridge board nga mohatag og konsiderasyon kay kami nga nasayod, nakahibaw sa sitwasyon diri sa Lapu-Lapu sa problema nga dili lalim kon usa ra ang agian kay daghan kaayo tag mga batan-on mga estudyante. It’s more than 10,000 nga taga Lapu-Lapu City and some of them are walking on that sidewalk lang sa bridge,” matod ni Chan.

Ikatulo mao ang paglibkas sa curfew order niini, diin wa na’y gitugtan nga makabaktas sa taytayan matag ala una sa kadlawn hangtod na sa alas singko sa buntag.

“Duna tay pobre nga kaigsuonan nga mouli anang orasa nga wa na poy sakyanan nga naglakaw lang sila. Total kon maghunahuna og suicide, naa naman pod tay kapulisan nga naa sa bridge,” pasabot sa mayor.

Matod ni Chan nga sakto na ang pagpakatap og pulis sa taytayan nga magbantay 24 oras pagpugong sa mga muambak.

Matod niya nga ang mga pulis nakapugong na og pipila ka mga tawo nga buot moambak.

Matod ni Chan nga andam siya modugang og mga barangay tanod gikan sa Pajo ug Pusok aron makatabang sa kapulisan. Ang Dakbayan sa Mandaue uyon usab sa pamahayag ni Chan.

Sila nagbansay-bansay sa mga barangay tanod sa Brgy. Looc ug Brgy. Umapad isip tabang sa pag monitor sa dapit.

“Ang gihimo nga solusyon nga sa dihang sagunson na ang paggamit sa bridge pag suicide, gibutangan natog police 24 oras sa bridge ug nagkauyon na ang Mandaue ug Lapu-Lapu nga magtinabangay ana”, matod ni Chan.

Dugang ni Chan nga di sab angay did-an ang mga magbisikleta tungod kay mahimo man nga abayan lang ang bisikleta paglakaw sa pedestrian lanes aron di makasamok sa trapiko.

“For me, kon naa kay bicycle, dili lang moipon sa sakyanan, mag walk lang birahon lang ang bisikleta,” dugang ni Chan.

Mandaue uyon

Ang Dakbayan sa Mandaue, pinaagi sa executive secretary ni Mayor Jonas Cortes nga si Atty. Eddu Ybañez, nipadayag usab nga dili angay nga iamong ang mga tawo nga mangagi sa taytayan.

“Supposed to be bridge baya siya so agianan gyud na siya from Mandaue to Lapu-Lapu. We cannot prohibit people nga moagi sa bridge just because naay nag suicide attempt sa atong bridge,” pasabot ni Ybañez.

Dugang ni Ybañez nga daghan usab nga mga trabahante sa Mactan Economic Zone (MEZ) nga mouli padulong sa Mandaue nga magbaktas nalang sa taytayan aron makadaginot og plete. Giuyonan sa kagamhanan sa dakbayan sa Lapu-Lapu ug Mandaue ang pagbutang og mas taas nga side railings sa duha ka taytayan nga muabot sa 180 centimeters o unom ka tiil aron mababagan ang mga molayat.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph