NIMANDO ang Lapu-Lapu City Prosecutors Office nga pabuhian na ang dul-an sa 200 ka mga Chinese national nga gisikop sa Criminal Investigation and Detection Group 7 nunot sa giingong kaso sa online illegal gambling.
Si Lapu-Lapu City Prosecutor Ruso Zaragoza niingon nga wa siyay nakitang probable cause sa pagpasaka dayon sa kaso sukwahi sa findings sa duha ka mga assistant prosecutor nga ning-inquest.
Samtang magpadayon ang imbestigasyon, gusto ni Zaragoza nga buhian una ang 181 ka mga Chinese national.
Kagabii gibuhian na sa CIDG 7 ang mga langyaw apan gipaubos una sila sa medical examination aron masiguro nga way sakit ang mga Chinese national nga makagawas gikan sa ilang kustodiya.
Matod ni Police Lieutenant Colonel Hector Amancia, deputy chief sa CIDG 7, nga ang piskalya nimando pag-release sa mga langyaw apan gihatagan silag 10 ka adlaw nga makaduso og motion for reconsideration.
“On going ang pag release nato nila gi-medical lang nato ato lang gipa-examine sa mga doktor para masigurado nga in good physical condition sila nga gi-release nato. Mo-submit mig motion for reconsideration hoping nga ma-file nato ang kaso. Gitagaan mig 10 days sa korte nga maka file sa motion," matod ni Amancia.
Padayon nga nibarog ang CIDG 7 nga legal ang ilang pagronda diin nakakita silag kalapasan sa Presidential Decree (PD) 1602.
Matod niya nga sa ilang pagronda, wa makapakitag papel ang Xin Huang Jin Cheng Company nga magpamatuod nga usa sila ka offshore gaming operator.
Ang naa sa ilang permit usa ka business process outsourcing (BPO), apan ang kompaniya niingon nga kompleto sila sa mga permit.
Matod sa kompaniya nihatag nag recommendation ang Philippine Gaming Corporation nga legal sila nga kompanya nga nag operate sa Philippine Online Gaming Operator (Pogo).
Girespeto hinuon sa Police Regional Office 7 (PRO) 7 kon unsa man ang desisyon sa piskalya ug padayon ang ilang suporta sa CIDG 7 nga maoy nangulo sa pag-serve sa search warrant nga giluwatan sa korte. (AYB)