NAKALINGKAWAS sa kamatayon ang usa ka mag-uuma nga kanhi piniriso sa Sablayan Prison and Penal Farm sa Occidental Mindoro human pusila sa riding in tandem alas 7 sa Miyerkules sa gabii, Septiyembre 11.
Ang biktima nga nakagawas niadtong Disyembre 2018 sa penal farm tungod sa good conduct time allowance (GCTA) giingong motahan unta karong adlawa, Biyernes, Septiyembre 13.
Si P/SSgt. Bricel Recarborda sa Dalaguete Police Station niila sa biktima nga si Manuel Mercado Amaya Jr., 56, taga Barangay Mantalongon lungsod sa Dalaguete.
Si Amaya gikombikto niadtong 1993 sa kasong murder ug frustrated murder.
Matod ni Recarborda nga si Amaya paingon na unta mosulod sa iyang balay gikan nipalit sa tindahan dihang duha ka mga tawo nga nag-angkasay sa motorsiklo ang niabot.
Ang angkas kalit lang nibunot sa armas ug gipusil pipila ka higayon si Amaya.
Si Amaya naigo sa wala nga paa ug duha ka mga bukton.
Dali siyang gidala sa tambalanan sa lungsod apan gibalhin sa Siyudad sa Sugbo kay niabiso ang naka-duty nga doktor nga kinahanglan ibalhin siya aron mas maatiman ang mga samad.
Dugang pa ni Recarborda nga sa katapusang impormasyon nga ilang nahibaw-an, si Amaya luwas na og kahimtang.
Hangyuon
Samtang ang kapulisan wa pay nakitang motibo sa pagpusil kang Amaya, apan wa nila isalikway nga bangi maoy posibleng rason sa pagpusil.
Si P/Maj. Rolan Aliser, hepe Dalaguete Police, sa pakighinabi sa Superbalita Cebu, niingon nga ilang nasayran nga si Amaya usa sa 1,915 nga naka pahimulos sa GCTA.
Dugang pa ni Aliser nga usa sa iyang gihatag nga tahas karon sa nag hawid sa kaso sa pagpusil kang Amaya mao ang pagkombinse kaniya sa pagtahan.
Si Mantolongon barangay konsehal Eunice Geoman, ig-agaw ni Amaya, sa pakighinabi sa Superbalita Cebu niingon nga motabang siya sa pagkombinser sa iyang ig-agaw aron mas luwas kini.
Siya nabalaka sa seguridad ni Amaya human sa bahad ni Presidente Rodrigo Duterte nga ipadakop ang mga nakapahimus sa GCTA buhi o patay kon di motahan.
Dugang ni Geoman nga karong adlawa na unta motahan si Amaya apan nalangan tungod kay namasahero sa habalhabal ang iyang ig-agaw aron dunay madala nga kwarta balik sa prisohan sa Mindoro.