KRITIKAL ang kahimtang sa usa ka 14-anyos nga sakristan human kini gipusil sa ulo sa tulo ka wa pa mailhing mga tulisan sayo kagahapon sa buntag.
Naglakaw sa dan Limkakeng, Horseshoe Hills, barangay Guadalupe siyudad sa Sugbo si Carlo Mangitngit, kuyog ang 8-anyos nilang silingan, kay gisugo sa pagpalit og kamunggay.
Giingong nag-text ang biktima samtang sila naglakaw ug matod pa, nigamit og tukog ang biktima sa iyang pag-text sa iyang Nokia 3310 kay gubaon na.
Nagduda si S/Insp. Michael Bastes, hepe sa Theft and Robbery Section (TRS) sa Cebu City Police Office (CCPO), nga ang mga suspek nga niagi sa dapit nagtuong touch screen ang cellphone sa biktima busa ilang gitulis.
Ang higala sa biktima niingon nga wa mopalag ang biktima apan gipusil gyud kini sa mga suspek hinungdan sa pagkaigo niini sa likod nga bahin sa iyang ulo.
Dali usab nga nanibat ang mga suspek luwan sa itom nga XRM motorcycle.
Matod ni Bastes nga maglisod sa pag-ila o paghulagway ang batang saksi kay giingong nagtabon sa nawong ug naka-helmet ang mga suspek. Nagsuot usab kini og itom nga jacket.
Apan matod ni Bastes nga dunay guwardiyang nakakita sa krimen apan wa pa kini nila mahinabi kay wa na sa dapit dihang nipahigayon sila og follow-up operation.
Usa ka kanhi binilanggo sa city jail nga luwan og itom nga motorsiklo nga niagi sa dapit ang gi-pick kagahapon sa grupo ni Bastes apan di pa gyud matumbok kon usa kini sa mga suspek.
“Tulo pud ni silang sakay og itom nga motor nibalik kuno ni sa dapit pero ingon niya (suspek) nga nitan-aw ra sila kay nakahibawo sila sa insidente kay gisultian adtong habalhabal drayber,” niingon si Bastes.
Dako ang pagtuo ni Bastes nga ang mga suspek sabog sa ginadiling drugas maong gipusil nila ang biktima bisan kon wa kini mosukol.
Ang kabanay sa biktima niingon nga buotan kini ug sakristan sa Alliance of Two Hearts ug wa kini giapilan nga bisan unsang gang o grupo.