LIMA ka mga batan-on ang nabitik sa kaugalingong binuhatan pinaagi sa kapulisan sa Marigondon sa dakbayan sa Lapu-Lapu human gi-gang rape ang usa ka 16 anyos nga babaye diha sa nahisgutang lugar niadtong Septiyembre 5, 2019.
Nasikop mao sila si Steven Pino, 18; Judy De la Torre Ochea, 20; Johnric Teves Ferrater, 19; ang lider sa grupo nga si McClark Alvaro Aying, 22; ug ang kauban niini nga menor de edad.
Sa pasiunang pakisusi sa kapulisan giingong misumbong kining dalagita kinsang ngalan gipugngan, ngadto sa kapulisan Septiyembre 6, 2019 sa kadlawn.
Matod ni Police Major Juan Capacio sa Marigondon Police Station nga nakit-an sa sakip sa City Traffic Management Service (CTMS) ang babaye nga naglakaw ug daw nangita og tabang, gidala niya kini sa police station ug didto kini misumbong sa nahitabo.
“Nakit-an na siya sa CTMS unya gipangutana siya kay kadlawn naman unya siya lang usa nisulti siya mao to nga gidala siya sa police station,” saysay ni Capacio.
Sa ilang pagtuki, nasayran nga modus sa grupo mao ang pag-hunting ug pag-chat ug mga babaye nga makighilawas kanila bugti sa pasalig nga P6,000.
Apan, kini pinaagi sa gihimo nila nga dummy account nga may ngalan nga “Chad Estrelloso.”
Hitsuraan ug daw kwartahan nga hulagway sa lalaki ang gibutang sa grupo sa maong dummy account.
Matod ni Capacio nga hinungdan nga mutugot ang mga biktima.
Nabantayan sa kapulisan nga daw susama sa kaso ni Christine Lee Silawan ang modus apan mas daghan na ang mo atake sa biktima.
Ang usa sa mga suspek nga si MC Clark Alvaro Aying, milutaw na sa records sa kapulisan, nag-atubang og kaso nga may kalapasan sa Republic Act No. 9995 nga anti voyeurism o pagpamoso Disyembre sa miaging tuig.
Nakalingkawas si Aying human gihatagan og probationary dismissal sa korte human wa na motungha pagbalik ang complainant.
Saysay sa suspek nga ang ilang gibuhat, kalingawan lamang sa kabatan-onan nga makighilawas.
“Agi lang sa pagkabatan-on ba trip trip lang wa man mi laing bisyo babaye raman,” matod sa usa ka suspek.
Ang 16 nga dalagita maoy ikatulo na sa mga nabiktima sa grupo.
Dugang ni Aying nga ipaagi nila sa usa ka drama ang pag gang rape sa mga biktima aron maluoy kini ug mutahan sa kaugalingon paghatag sa gusto sa mga suspek.
Niadtong Martes, Septiyembre 10, 2019 human sa pagmonitor sa kapulisan gipan-an niini si Aying paggamit sa account sa biktima nga makigtagbo diha sa usa ka convenient store, pulis na diay ang iyang ka chat.
Gahapon sa buntag atubangan sa mayor sa dakbayan, Junard “Ahong” Chan, gipresentar kaniya ang upat ka mga suspek diin nangayo pa og pasaylo ang upat ngadto sa pamilya sa biktima ug sa mayor uban sa kapulisan.
Matod ni Chan nga ang pagkasikop sa upat kapanaminan unta kini sa mga dunay di maayong intensyon sa mga oponganon ug di niya buot mahitabo pa ang insidente susama sa kaso ni Silawan.
“Ako ni ipresentar sa atoang mga kaigsuonan kay daghan naman ni silag nabiktima, mudangop sila sa opisina sa Mayor ug sa opisina sa kapulisan sa pagsumbong nga sila usa sa mga nabiktima nila (mga suspek) di ko gusto nga mahitabo ang nahitabo kang Silawan kaniadto,” matod ni Chan.
Ang upat ka suspek mag-atubang og kasong rape samtang tanggong usab ang menor de edad ubos sa kustodiya sa Social Welfare Services (SES) office sa siyudad sa Lapu-Lapu. (CSWS).