NIHATAG karon og konsiderasyon ang kadagkuan sa Mactan Cebu Bridge and Management Board (MCBMB) sa mga magbiseklita ug maglakaw nga moagi sa duha ka taytayan nga nagdugtong sa dakbayan sa Mandaue ug Lapu-Lapu.
Atol sa emergency meeting nga gipatawag sa chairman sa MCBMB nga si Gobernador Gwendolyn Garcia kagahapon, Septiyembre 13, nadesisyonan nga mahimo nga makaagi ang mga mag biseklita sa duha ka taytayan.
Apan kinahanglan nga ilang guroyon ang ilang mga biseklita sa higayon nga moagi sa taytayan inay sakyan o tindakan.
Kini aron kalikayan ang disgrasya sa mga mag biseklita sa duha ka mga taytayan.
Usa usab kini ka paagi nga dili makatampo sa dagan sa trapiko ang mga magbiseklita sa taytayan.
Giangkon ni Garcia nga nakaabot sa iyang atensyon ang mga reklamo ug pagsaway sa social media human nga nadesisyonan unta sa MCBMB ang pagdili sa mga magbiseklita nga makaagi sa duha ka taytayan.
Apan iyang gipahinumdoman ang mga nanaway nga ubos sa Republic Act (RA) 4136 gidili ang pag-agi sa mga biseklita sa mga taytayan ug flyover gumikan kay gitagana lang kini alang sa mga motor vehicle.
Mitambong sa gipatawag nga panagtigom ni Garcia mao ang kapulisan, City Traffic Management System sa dakbayan sa Lapu-Lapu, Traffic Enforcement Agency of Mandaue (Team), Department of Public Works and Highways DPWH ug si Rory Jon Sepulveda, consultant sa gobernador ug usa usab ka bicycle enthusiast.
“The law is the law kung you dare to cross the bridge karon nga mag biseklita ka you’re breaking the law so syaro naman ug di na mi ana makatubag kay naa naman na sa mga pulis law enforcement agency naman ana ug mang-bash pa gyud mo kay di mo ka biseklita across the bridge ipausab ninyong balaod,” matod ni Garcia.
Nadesisyonan usab atol sa emergency meeting sa MCBMB nga ipatuman ang one-way nga agianan alang sa mga pedestrian nga moagi sa Mandaue-Mactan Bridge.
Kini aron kalikayan ang disgrasya sa mga pedestrian nga maglakaw sa taytayan hilabi na nga walay railings ang naasoyng taytayan.
Alang niadtong maglakaw gikan sa habig sa Mandaue paingon sa Lapu-Lapu, mahimo silang makaagi sa wala nga habig nga pedestrian sa taytayan, samtang sa mga pedestrian gikan sa Lapu-Lapu paingon sa Mandaue, sa wala nga habig sa pedestrian sa taytayan moagi.
Dili mopatuman og one-way nga agianan alang sa mga pedestrian ang MCBMB sa Marcelo Fernan Bridge sanglit aduna kini klarong pedestrian lane ug aduna usay railings nga makaprotehir sa mga u“We must be very strict sa first bridge kay hinomdomi walay railings. Kung magsugat mo dinha unya daghan mo kaayo, ang tendency is mo-step ka into the vehicular lane so mas kuyaw pa hinuon. So we will require one-way nga passage for pedestrians and those with bicycles nga magduso na sa ilang biseklita. Ang theory there is kung maglakaw ka makakita gyud ka sa mga sakyanan,” matod ni Garcia.
Samtang sa hangyo ni Lapu-Lapu City Mayor Junard Chan nga dili na lang ipatuman ang curfew sa taytayan sa ala 1:00 hangtod sa alas 5:00 sa kaadlawon gumikan kay adunay pipila ka Oponganon nga mouli og dugay ug maglakaw ra, i-review pa sa MCBMB kalabot sa mga lagda sa implementasyon.
Sa pagkakaron, mga pulis ug tanod nga nag-roving sa duha ka taytayan. (GCM)