TUNGOD sa kalapad sa epekto sa bagyong Marilyn ug sa gipakusog nga habagat, giisa ang gale warning sa pipila ka parte sa Central Visayas hinungdan sa mga kanselado nga biyahe sa kadagatan.
Alas 5:00 sa buntag niadtong Biyernes, Septiyembre 13, dihang giisa sa Pagasa ang gale warning sa habagatang bahin sa Bohol, Siquijor, ug habagatan sa Negros Oriental.
Tanang sakyanang pangdagat nga 250 gross tonnage ug paubos ang wala na pabiyahia sa Coast Guard (CG).
Sumala sa CG District Central Visayas, sugod alas 10:00 sa buntag sa Biyernes, kanselado ang biyahe gikan Sugbo paingon sa Ormoc, Leyte; Getafe, Bohol; Tagbilaran, Bohol; ug isla sa Camotes paingon sa Ormoc, Leyte.
Matod ni Pagasa Visayas officer-in-charge (OIC) Engr. Al Quiblat, tua sa 1,045 sidlakan sa Basco, Batanes si 'Marilyn' ug gikatakda nga mogawas sa Philippine Area of Responsibility (PAR) karong Dominggo, Septiyembre 15. (HBL)