NAGHINAMHINAM ang Sugboanong higante nga si JuneMar Fajardo dihang iyang nasayran nga adunay nakatakdang duwa ang iyang team nga San Miguel Beermen dinhi sa Sugbo sa umaabot nga Philippine Basketball Association (PBA) Governor’s Cup.
Mao kini ang gipabuhagay sa produkto sa University of Cebu (UC) Webmasters ug lumad nga taga lungsod sa Pinamungajan, Cebu sa dalikyat nga pagpakig-estorya sa Sun.Star Cebu.
Ang Beermen, nga nagtingugang makabaton sa ikaduha nilang Grandslam title sa season-ending conference, makigbatok sa Rain or Shine Elasto Painters karong Nobiyembre 9, 2019 sa Hoops Dome sa Lapu-Lapu City.
Kini basi sa opisyal nga eskedyul nga gipagawas sa PBA niadtong Huwebes.
Batbat sa PBA 5-time MVP nga mao na kini ang kahigayunan sa mga Sugboanon nga makakita pagbalik og duwa sa PBA ug ikahimamat sa personal ang idolo niining mga basketbolista.
Si Fajardo kasamtangang nagbakasyon sa ilang panimalay sa Pinamungajan kauban ang iyang pamilya human sa iyang pagduwa sa Gilas Pilipinas sa FIBA 2019 Basketball World Cup sa China.
Ang Beermen, nga milangkat sa premiro nilang Grandslam title niadtong 1989, makigbatok sa Phoenix Fuel Masters sa labing una niining tahas sa Governor’s Cup. (JNP)