SUPERBALITA DAVAO

Mt. Apo mahimo na sab laagan


DAVAO DEL SUR -- Gikalipay sa mga climbers ug mga porters nga subling ablihan na sa Protected Area Management Board (PAMB), ilawom sa Department of Environment and Natural Resources (DENR), ang dalan padulong sa pinakataas nga bulkan sa nasud, Mt. Apo.

Apan sa pito ka mga trail padung sa bulkan, bugtong ang Digos, Davao del Sur trail pa lang ang giablihan, gawas sa lungsod sa Sta. Cruz nga karong Septyembre 15 pa tugtan nga moagi ang mga mountaineers.

Mga trail nga padulong sa bulkan, gawas sa Sta. Cruz ug Digos sa Davao del Sur; naa sab ang Bansalan; Tamayong, Calinan, Davao City; Kidapawan City; Magpet ug Makilala sa North Cotabato.

Sa lungsod sa Bansalan, nalipay ang porter nga si Isidro Morales, 41, sa maong katikaran tungod kay makabalik na sab sila sa ilang panginabuhian ilabi na kung daghang climbers ang moagi sa lugar.

Agosto 30 ning tuiga, gipahibawo sa Department of Tourism sa Davao pinaagi sa ilang Facebook Page nga subling abrihan sa PAMB ang Mt. Apo sugod ning buwan sa Septyembre.

Kahinumdoman nga niadtong Abril, gimando sa gobyerno ang pagsirado sa Mt. Apo sa kabalaka nga subling masunog sama sa nahitabo niadtong Marso 2016, tungod sa kainit nga hatud sa El Niño.

Ang pag-abri nahitabo human nga niabiso ang Philippine Atmospheric Geophysical and Astronomical Services Administration (Pagasa) nga natapos na El Niño period.

Hinuon, samtang gisuwat kining balita, wala pay nadawat nga abiso ang uban pang trail padung sa bulkan nga abrihan sab.

Apan giklaro ni Paner nga limitado sa 50 climbers matag adlaw ang tugtan nga mosaka sa bulkan diin istriktong gidili ang pag-camping sa peak sa Mt. Apo aron malikay sa sunog.

Hugtanon sab nga i-monitor ang mga moadto sa bulkan nga kinahanglang adunay permit.

Gipahimangnoan sab sa mga opisyal ang mga trekkers nga mag-amping tungod sa sobrang kabugnaw sa lugar hatud sa daut nga panahon ug mga nasinating pag-ulan. (Orlando B. Dinoy)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph