PRISO ang duha ka gituohang holdaper human gisuklan sa 68-anyos nga taxi driver nga ilang gitulis, Huwebes sa gabii, Septiyembre 12, sa Nova Tierra Subdivision, Lanang, Davao City.
Mga suspek giila sa Sasa Police Station nga sila Kim Jesmart Galupo, 20-anyos, ug ang menor de-edad nga si alyas Mark, 16-anyos.
Sa inisyal nga imbestigasyon sa kapulisan sa Sasa PNP, ang duha misakay sa taxi nga gimaneho ni Liberato Desoyo, 68-anyos, gikan sa R. Castillo ug nagpahatud sa Nova Tierra Subdivision.
Pag-abot sa lugar, gitionan og kutsilyo ang drayber ni Galupo samtang ang menor de edad miilog sa pitaka niini.
Apan nagunitan sa drayber ang kutsilyo hinungdan nga nagkagubot sila ug gilayong nanagan ang mga suspek.
Apan nakit-an sa guwardiya sa subdivision ang hitabo hinungdan nga dali kining miresponde ug nasikop ang mga suspek.
Gilayong gipangtunol ngadto sa kapulisan sa Sasa PNP ang duha kinsa mag-atubang og kaso samtang ang menor de edad giintrigo sa Women and Children Protection Desk.