Albor: Abag bisag walay pcso
DILI baya kabalak-an bisan magpadayon kadtong pagpasirado ni Pres. Rodrigo Duterte sa sugal nga gihatagan og pagtugot sa Philippines Charity Sweepstakes Office (PCSO). Hulyo 27, 2019 gisuspenso ang Lotto, Swertres, Small Town Lottery (STL), Peryahan Ng Bayan ug Keno tungod sa lapad nga kurapsyon.
Napungot si Duterte. Hulyo 31, 2019 gibalik ang operasyon sa lotto draws, swertres ug six digits operation. Wala ilibkas ang pagsuspenso sa STL, Peryahan Ng Bayan ug Keno kay natataw ang paghitak sa anomaliya gisagolan sa ilegal nga operasyon ug gisudlan sa grupo sa sindikato.
Dakong binoang ang STL nga minos ang remittance sa mga operators ngadto sa PCSO. Miangal usab ang lotto operators sa STL kay apektado ilang kinitaan. Kahinomdoman sila si PCSO Chairman Jose George Corpus ug Gen. Manager Alexander Balutan gitaktak human gibutyag sa jueting whistleblower ug Dir. Sandra Cam sa sobrang gasto nga 6M pesos sa ilang X-mas party.
Ang Individual Assistance Program sa PCSO alang sa mga kabos nga mga pasyente daghang ikahulip. Dunay Malasakit Centers nga maoy mobayad ang funding agencies DOH. Pagcor, DSWD ug Philhealth nga dunay libreng hospitalization ubos sa Universal Health Care, pundo sa publikong tambalanan gikan sa mga magbabalaod ingon man sa gitanyag nga programa sa local govt. units alang sa panglawas.
Ang sugal sa PCSO legal pinasikad sa Republic Act 1169 aron pagwagtang niadtong jueteng sa Luzon ug masiao sa Visayas ug Mindanao. Sa kinitaan sa PCSO 55 porsento alang sa premyo, 30 porsento sa charity ug 15 porsento sa operation.
Idlas ang kahigayonan sa lotto nga dakog gasto ang minilyon nga namusta apan usa lang ang palaran. Nipis ang kadaugan ssa swertres nga ang mga pobre giduso sa tumang kalisod gumikan sa pamasin sa buntag, hapon ug gabii maangin ang igpapalit sa bugas ug sud-an. Samot ang casino kay daghang nabangkarota. Ang casino ug Pogo alang lamang sa mga kwartahan. Walay nabulahan sa sugal kon atong hulman ang pulong sa katigulangan. Hinoon gihimong kalingawan bisan lisod pagdaog sa kadaghan sa kombinasyon. Lisod man gani ang pagdaog sa sabong sa manok nga duha ray pilian. Diay sa Cockfighting Law nagtugot sa tari sa adlawng Domingo, holidays ug piyesta. Maong nasipong pagdakop kadtong 370 ka mga sugarol sa D & C Mandaue Coliseum kay nagpatari og Lunes. Samot nga naputol ang ginagmayng kalipay sa tigbakay.
Samtang misiaw ang illegal online gambling kamatuoran ang 180 ka Chinese nationals ang nadakpan sa CIDG sa Mactan. (csa_1156@yahoo.com / 09064648954)