Editoryal: Move on na

editorial-ariel-itumay-091419
editorial-ariel-itumay-091419

WA PA molurang ang inalisngaw sa kainit sa niaging eleksiyon sa dakbayan sa Lapu-Lapu.

Kini tungod kay 28 sa 30 ka mga kapitan sa barangay sa maong siyudad nga kaalyado sa mga Radaza, ang mipasaka og reklamo batok ni Mayor Junard Chan ngadto sa buhatan sa Ombudsman, human niya kuhai og opisina si Kongresista Paz Radaza diha sa City Hall building.

Grave coercion, grave misconduct, conduct unbecoming of a public officer, grave abuse of authority, oppression and violation of Section 3 (e ) of Republic Act (RA) 3019 or the Anti-Graft And Corrupt Practices Act ang ilang giduso batok ni Chan niadtong Sept. 4, 2019.

Alang sa mga kapitan nga gipangulohan ni ABC President Eduardo Cuizon, nga di makaingayon ang pagpasira sa mayor sa buhatan ni Chan diha sa City Hall building.

Tungod kay mao na kini naandan sa mga barangay officials ug sa mga tawo nga adtoanan sa higayon nga aduna silay tuyo ilabi nag kalabot sa mga programa sa kongresista. Ila usab gitumbok nga wala masubay sa proseso ang pagpasira niini.

Katungod man tuod sa mga kapitan ang pagpasaka og reklamo, pero ambot og nihaom ba kining ilang rason.

Dili na ba diay sila makaduol ni Radaza kon magbutang kini og laing opisina nga dili sulod sa City Hall building? Dili ba ang pagsira sa buhatan sa kongresista katungod man sa mayor, sigon sa opinyon sa Department of Interior and Local Government (DILG)?

Nahuman na ang eleksiyon ug pilit na untang dawaton ang kamatuoran. Panahon na karon sa pagserbisyo alang sa kaayohan sa katawhan.

Gipili sa kinabag-ang Oponganons si Chan nga maoy modala sa renda sa pangagamhanan, butang nga angay lang usab respetohan sa kapitan. Move on na intawon mo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph