DRIVER'S license nga mamahimo rang makuha o ma-transact online?
Mao na karon ang gitutokan sa Land Transportation Office (LTO) Central Visayas human mismo ang regional director sa maong ahensiya ang mibutyag pinaagi sa iyang Facebook account sa mga tawo nga nagtanyag niini sa Marketplace sa Facebook o kining mga Facebook Group nga naninda sa social networking site.
Si LTO Central Visayas Regional Sirector Victor Emmanuel Caindec nibutyag nga “fake” kining mga gitanyag nga mga driver’s license sa Facebook.
“If wala ka ni adto sa LTO to apply and pass the exam, sure na nga fake,” si Caindec nagkanayon.
Dugang ni Caindec nga ilaha na kining gitaho sa National Bureau of Investigation (NBI) aron maimbestigahan kini.
“Constantly monitored na man na sila sa NBI. Hulat na lang ta madakpan.”
Sa Facebook post ni Caindec sila si Mae Cyrille Generalao nga gitanyag ang maong lisensya sa Cebu Tindahan ug si Mike Laetner kinsa nitanyag sa maong lisensya sa Online sa Tindahan sa Mandaue.
“Unsa kaha maayo buhaton ani nila? Dili man gyud mo undang. Puwede ba kaha ni ipa "ads" na lang ni sila sa mainstream media? Kay madakpan mo bail ra man dayon. Cash pa. Business is booming ni sila,” sa Facebook post ni Caindec.
Pahibawo ni Caindec sa publiko nga nagtanyag sa maong mga card nga peke kini, “Fake na nga cards. Ang tinuod nga license gi-upload na ang biometrics and facial capture data. Parehas ra na sa kwarta nga gi print parehas nga printed pero naay fake.”
Dili kini ang unang higayon nga aduna’y isyu sa driver’s license sa Sugbo, tungod kay niadtong Hulyo, unom ka kawani sa LTO Licensing sa SM Seaside ug laing duha ka fixers ang nadakpan sa NBI human nitanyag kini og fixing nga nagkantidad og P7,500.
Usa ning mga eksaminasyon sa pagkuha sa lisensya nga i-fixer sa kadaghanan tungod sa kalisod sa maong exam. (Superbalita Cebu)