ABTIK kaayong milihok ang lokal nga kagamhanan sa Davao City, labi na kung hisgutan ang problema sa emerhensiya.
Gani naila ang dakbayan sa Davao sa tibuok kalibutan nga usa sa mga pinaka-kompleto og kagamitan sa emerhensya diin ang Central 911 ubos sa Public Safety & Security Command Center (PSSCC) ang mibida.
Sa miaging adlaw hangtud karong adlawa, nagsugod na sab og dagko ang mga balod sa kadagatan ning siyudad, gumikan sa hinungaw sa daut nga kahimtang sa panahon ug ang pagpasulabi sa hanging Habagat.
Gilayong mipahimangno ang lokal nga kagamhanan sa mga residente nga anaa daplin sa kadagatan sa mga evacuation areas nga puwede nilang kahiklingan.
Abtik gayod kung maingon ang Local Government Unit (LGU) ning siyudad nga maoy giangkla ni Pangulong Rodrigo Duterte niadtong mayor pa siya sa hataas nga katuigan.
Panahon sa dunay sunog, baha ug mga hitabo nga resulta sa katalagman, anaa dayon ang kasingkasing sa siyudad sa pagtabang sa mga biktima.
Gani bisan sa mga katalagman nga mahitabo sa nasud, anaa dayon ang mga Dabawenyo, mopadala dayon og hinabang sa mga dapit nga gilubok sa trahedya.
Ang Davao City karon ang napanaminan sa pipila ka mga lugar sa Pilipinas diha sa pagpatuman sa mga balaod ug ang presensya sa pagtabang sa uban.
Angay lamang nga kapanaminan ang dakbayan sa Davao aron sa ingon makab-ot ang tiunay nga kalinaw ug gugma sa komunidad.