CARMEN, Davao del Norte -- Gipalawman sa Panabo City Police Station ang imbestigasyon sa pagpusil-patay sa lead woman sa sagingan sa Barangay Sto. Niño, Carmen, Davao del Norte, Biyernes sa buntag, Septiyembre 14.
Ang biktima si Nessel Ybañez Aragones, lead woman sa usa ka sagingan sa nasangpit nga siyudad kinsa gipusil sa wa mailhing mamumuno samtang sakay sa iyang motorsiklo.
Nasayran nga padulong na unta ang biktima sa iyang trabahoan dihang kalit kining gitaparan sa naka-motorsiklo dayon gipusil, igo sa ulo.
Gisulayan pa og dala sa ospital ang biktima apan gideklara kining dead on arrival sa mga doktor.
Ning kasamtangan, blangko pa ang kapulisan sa Panabo City PNP sa pagsuta sa motibo ug sa pagtumbok sa suspetsado.
Padayon ang gihimong imbestigasyon sa kapulisan labot sa maong kaso. (Jeepy P. Compio)